Ушырасыўда Президент кеңесгөйиниң орынбасары Музаффар Комилов, Дин ислери бойынша комитет баслығы Содиқ Тошбоев, муфтий шайх Нуриддин Холиқназар, атташе Шуҳрат Амоний, Ҳаж ҳәм умра министри Тавфиқ бин Фаузон ар-Рабиа, Саудия Арабстаны елшиси Юсуф аль-Утайбий қатнасты.

Сөйлесиў алдынан Өзбекстан Президенти ҳәм Саудия Арабстаны Патшасы Салмон бин Абдулазиз Ол Сауд ҳәм мийрасхор шахзада Муҳаммад бин Салмонның ис-ҳәрекетлери себепли еки тәреплеме қатнасықлар табыслы раўажланып атырғаны, делегациялар алмасыўы жеделлескени, зыяратшыларға жоқары дәрежедеги хызметлер көрсетилип атырғаны атап өтилди, делинеди дин ислери бойынша комитет баспасөз хызметиниң хабарында.

Сәўбетлесиў ўақтында жақынласып киятырған ҳаж мәўсиминде зыяратшылардың қәўипсизлигин тәмийинлеўге қаратылған жаңа қағыйдалар бойынша пикир алысылды. Атап айтқанда, Ҳаж байрамында медициналық талапларға қатаң әмел етиў, ҳүжжетлерди өз ўақтында рәсмийлестириў, шәртнамаларды орынлаў ҳәм белгиленген нормаларға әмел етиў әҳмийетли екенлиги атап өтилди.

Ҳаж министри мәмлекетимиз басшысының басламасы менен әмелге асырылып атырған реформаларды, илимий-изертлеў ҳәм қурылыс тараўларындағы табысларды жоқары баҳалап, Ҳаж ҳәм Умра мәресимлериниң шөлкемлестирилиўин, өзбекстанлы зыяратшылардың тәртибин унамлы баҳалады. Сондай-ақ, Өзбекстанға барып, Самарқандтағы Ислам цивилизациясы орайы ҳәм Имам Бухарий естелик комплексиниң ашылыў мәресиминде қатнасыў тилегин билдирди.

Буннан тысқары, тәреплер зыярат туризмин раўажландырыў, Өзбекстанның әййемги қалаларына саяхатларды шөлкемлестириў, илим ҳәм изертлеўлер тараўындағы бирге ислесиўдиң перспективаларын додалады.

Ушырасыў жуўмағында тәреплер өз-ара естелик саўғалары менен алмасты ҳәм бир қатар бағдарларда бирге ислесиўди даўам еттириўге таяр екенлигин билдирди.