Халықаралық мийманлар ағымы 2019-жылға салыстырғанда 73 процентке артып, туристлердиң өсиў пәтлери бойынша 2019-жылға салыстырғанда Европа регионында 2-орынды ийеледи.
2025-жылдың тоғыз айында сырт ел туристлериниң саны 2024-жылға салыстырғанда 13 процентке өсип, Өзбекстан Европа регионында ең көп өсип атырған туризм бағдарларының ТОП-4 қатарына кирди.
БМШтың туризм бойынша есабатында атап өтилиўинше, 2025-жылдың январь-сентябрь айларында дүнья жүзи бойынша туризм орташа 5 процентке өсип, тараўдың пандемиядан кейинги турақлы тиклениўин көрсеткен, Өзбекстанның көрсеткишлери болса бул орташа дәрежеден сезилерли дәрежеде жоқары.
2025-жылы мәмлекетке 10,7 миллионнан аслам сырт ел туристлери келген, апрель айынан баслап тарийхта биринши мәрте айлық ағым бир миллионнан асқан. Туризм хызметлери экспортынан түскен дәрамат 4,4 миллиард доллардан асты.
Туристлер ағымының өсиўи виза тәртибиниң кеңейиўи, транспорт қолайлылығының артыўы, халықаралық маркетингтиң раўажланыўы, жаңа мийманханалар ҳәм туристлик компаниялардың ашылыўы, туризм тараўында қәнигелердиң таярланыўы менен түсиндириледи.
Самарқанд, Бухара ҳәм Хийўадан тысқары, экологиялық ҳәм гастрономиялық туризмниң ғалаба ен жайып атырғаны мәмлекетимиздиң туристлик усыныслары диверсификацияланып атырғанынан дәрек береди.
Алыс мәмлекетлерден туристлер санының көбейиўи Өзбекстанның глобал туризм базарындағы орны беккемленип атырғанын тастыйықлайды ҳәм тараўды буннан былай да раўажландырыў перспективаларын жаратады.
