Делегацияларға Өзбекстан Республикасы сыртқы ислер министриниң биринши орынбасары Баҳромжон Аълоев ҳәм Иордания сыртқы ислер ҳәм миграция мәселелери бойынша министриниң биринши орынбасары Дайфулло Али Аль-Файиз басшылық етти.
Сөйлесиўлер ўақтында Иордания Ҳошимийлер Патшалығы Патшасы Абдулла II ибн аль-Ҳусайнниң Өзбекстанға дәслепки сапары еки тәреплеме бирге ислесиўдиң жаңа басқышын баслап бергени атап өтилди.
Тәреплер сапар етиўдиң жуўмақлары бойынша қол қойылған "Жол картасы"нда белгиленген ўазыйпаларды басқышпа-басқыш әмелге асырыў мәселелерин додалады. Сиясий сөйлесиўди тереңлестириў, парламентлераралық байланысларды беккемлеў, шәртнамалық-ҳуқықый базаны кеңейтиў ҳәм халықаралық шөлкемлер шеңбериндеги бирге ислесиўди раўажландырыўға таяр екенлигин тастыйықлады.
Экономикалық дипломатия мәселелерине - өз-ара саўда көлемин арттырыў, экономикалық байланысларды диверсификациялаў ҳәм биргеликтеги инвестициялық жойбарларды алға қойыўға айрықша итибар қаратылды.
Мәдений-гуманитарлық байланысларды, билимлендириў, илим ҳәм туризм тараўларындағы бирге ислесиўди кеңейтиў перспективалары, сондай-ақ, халықаралық ҳәм регионаллық күн тәртибиниң айрықша мәселелери көрип шығылды, - деп Өзбекстан Республикасы сыртқы ислер министрлиги баспасөз хызмети хабар бермекте.
