Мәресимде шығып сөйлеген ўәлаят ҳәкими Хайрулло Бозоров Өзбекстан менен Қытай арасындағы стратегиялық шериклик жедел раўажланып атырғаны, еки мәмлекет жетекшилериниң беккем сиясий ерк-ықрары себепли өз-ара исеним, дослық ҳәм өз-ара пайдалы бирге ислесиў принциплери беккемленип атырғанын атап өтти. Оның атап өтиўинше, Қытай Өзбекстан экономикасының ең ири инвесторы ҳәм ең әҳмийетли саўда-экономикалық шериги болып қалмақта, бул болса аймақлараралық байланысларды жеделлестириўге хызмет етпекте.
"Ўәлаятымызда әмелге асырылып атырған биргеликтеги жойбарлар буның айқын дәлили болып есапланады. Бүгинги илаж "Бир мәкан - бир жол" бағдарламасы шеңбериндеги әҳмийетли қәдем болып, экономикалық ҳәм саўда байланысларын және де тереңлестириўге хызмет етеди, - деди ўәлаят басшысы.
Жаңа жойбарлар аймақтың санаат, туризм ҳәм логистика тараўларына үлес қосады.
Үш тийкарғы объекттиң қурылысы басланды:
Евразия халықаралық саўда орайы,
Hilton DoubleTree мийманханалары,
"Фошан" өндирислик-индустриал парки.
Бул жойбарлар Ферғана ўәлаятының санаат потенциалын, логистика имканиятларын ҳәм туризм инфраструктурасын кескин арттырыўға хызмет етеди. Олар Қытай инвесторлары менен өткерилген сөйлесиўлер ҳәм ерисилген келисимлердиң тиккелей әмелий нәтийжеси болды.
Бүгинги күнде аймақта Қытай капиталының қатнасыўында 273 кәрхана жумыс алып бармақта. Сондай-ақ, және 100 ге шамалас перспективалы жойбарларды әмелге асырыў режелестирилген болып, олар бойынша дәслепки жумыслар алып барылмақта.
Қытайлы инвесторлар тәрепинен жойбарлардың тийкарғы қатнасыўшысы болған Hengtai жуўапкершилиги шекленген жәмийети шөлкемлестирилди ҳәм дизимнен өткерилди. Инвестициялардың улыўма баҳасы - 350 миллион доллар.
Илаж шеңберинде төмендегилер режелестирилген:
Ферғана қаласында 40 гектар майданда заманагөй санаат зонасын қурыў;
Марғилан қаласындағы Бурханиддин Марғиноний атындағы илимий-туризм комплексинде бес жулдызлы мийманхана қурыў;
Ферғана районындағы 32 гектар майданда ири саўда-логистика орайын шөлкемлестириў.
Жойбарлардың әмелге асырылыўы нәтийжесинде 10 мыңнан аслам жаңа жумыс орны жаратылыўы күтилмекте.
Хайрулло Бозоров жаңа жойбарлар ўәлаят экономикасында әҳмийетли орын ийелейтуғынын атап өтип, олардың нәтийжелилигине исеним билдирди ҳәм қытайлы бирге ислесиўшилерге көрсетилген баслама ушын миннетдаршылық билдирди.
Илажда сөзге шыққан Hengtai компаниясының тийкарын салыўшысы Чен Минбо, Қытай туризм палатасының баслығы Цзи Сяодун, Өзбекстан - Қытай кәрханалары саўда палатасының вице-президенти Лиу Цзинмин ҳәм Hilton Worldwide компаниясының ўәкили Алексей Шаталов Өзбекстанда инвесторлар ушын үлкен имканиятлар жаратылғанын, бирге ислесиў көлеми кеңейип атырғанын атап өтти.
Өзбекстан Уллы жипек жолының стратегиялық аймағы екени, Ферғана ўәлаяты Евроазия регионының ең әҳмийетли логистика хабына айланыў ушын жоқары потенциалға ийе екени атап өтилди.
Мәресим шеңберинде Hengtai ҳәм Hilton Worldwide компаниялары арасында бирге ислесиў меморандумына қол қойылды.
Буннан соң қурылыс жумысларына рәсмий старт берилип, ирге тасы қойылды.
Ушырасыў соңында нураныйлар басшылығындағы илаж қатнасыўшылары өзлериниң жақсы тилеклерин билдирип, елимизге тынышлық, турақлылық ҳәм қут-берекет, басланып атырған барлық жумысларға берекет тиледи.
