Илаж Өзбекстан Республикасы Туризм комитети тәрепинен Өзбекстан Аспазлар аўқамы менен биргеликте шөлкемлестирилди. Фестивалдан гөзленген мақсет - мәмлекетимиздиң туризм потенциалын беккемлеў, туристлер ағымын көбейтиў ҳәм миймандослық тараўындағы хызметлер көлемин кеңейтиўден ибарат.
"Ләззетли Өзбекстан" фестивалы жылдың ең ири гастрономиялық илажларынан бири болып, Швейцария, Франция, Әзербайжан, Италия, Германия, Түркия сыяқлы 30 дан аслам мәмлекеттен қәнигелер ҳәм мийманларды жыйнайды.
Аспазлар чемпионаты Дүнья жүзилик аспазшылар жәмийетлери ассоциациясы (WACS) стандартлары тийкарында өткериледи. Өзбекстан ҳәм сырт еллерден келген қатнасыўшылар заманагөй гастрономиялық коньцепциялар ҳәм миллий тағамлардан баслап нан писириў ҳәм шоу-десертлерге шекемги 12 номинация бойынша өз шеберлигин көрсетеди.
Үш күнлик бағдарлама шеберлик сабақлары, дегустациялар, гастроль көргизбелери, сондай-ақ, жас аспазлар таңлаўын өз ишине алған болып, онда дәстүрий өзбек тағамларының заманагөй түсиниклери көрсетиледи.
Бундай илажлар гастрономиялық туризмниң раўажланыўына хызмет етеди, Өзбекстанның бийтәкирар кулинариялық мийрасқа ийе мәмлекет сыпатында халықаралық имиджин беккемлейди, туризм ҳәм гастрономия тараўында кәсиплик алмасыў ҳәм халықаралық бирге ислесиў ушын жаңа имканиятлар ашады.
