2026-2027-жылларда интеллектуаллық мүлк тараўын раўажландырыўдың мақсетли көрсеткишлери:
миллий брендлерди үгит-нәсиятлаў арқалы дизимнен өткен ИМ объектлериниң санын 100 мыңға, дизимнен өткен географиялық көрсеткишлердиң санын 40 қа жеткериў;
АИ технологияларын қолланыў арқалы ИМ объектлерин дизимнен өткериў процесинде экспертиза өткериў мүддетлерин 2 есеге қысқартыў, уйымлараралық ҳүжжетлер алмасыўының электрон түрине толық өтиў;
патентли исенимли ўәкиллердиң санын 400 ге шекем, сондай-ақ, сырт елде маманлығын арттырған ИМ тараўындағы қәнигелердиң санын 200 ге шекем арттырыў.
Мәлимлеме технологиялары тараўында мәмлекетлик хызметлерди көрсетиўде тәртип-қағыйдаларды әпиўайыластырыў ҳәм оларды ҳуқықый ҳәм методикалық жәрдем көрсетиў менен биргеликте әмелге асырыў режелестирилмекте.
Бюрократлық тосқынлықларды сапластырыў мақсетинде композит ҳәм проактив түрде көрсетилетуғын мәмлекетлик хызметлер саны көбейтиледи.
Әдиллик министрлигиниң "Санаат мүлкин қорғаў" ҳәм «IP Protection» мәлимлеме порталлары тийкарында төмендеги имканиятларды беретуғын "Интеллектуаллық мүлкти қорғаў" порталы иске қосылады:
ИМ мәселелери бойынша мүрәжатларды қабыл етиў, ИМ объектлерин дизимнен өткериў бойынша келип түскен арзаларды экспертизадан өткериў процесслерин жетилистириў;
онлайн режиминде шәртнамалар дүзиў;
ИМ мәселелери бойынша методикалық усынысларды жайластырыў, сондай-ақ, пуқаралар ҳәм исбилерменлик субъектлериниң сораўларына реал ўақыт режиминде (онлайн) жуўап бериў;
контрафакт товарлар ҳәм веб-сайтлар ҳаққындағы мағлыўматларды жайластырыў.
2026-жыл 1-марттан баслап:
Денсаўлықты сақлаў министрлиги биологиялық актив затларды алып кириў ҳәм ислеп шығарыў ушын руқсатнама бериў процесинде Интеллектуаллық мүлк порталы арқалы ИМ объектлерине (товар белгилери ҳәм санаат үлгилери) болған ҳуқықларға әмел етилиўин мәжбүрий түрде тексереди ҳәм (ямаса) үйренеди;
Исбилерменлик субъектлериниң турақлылық рейтингин анықлаўда суд тәрепинен ИМға байланыслы ҳуқықбузарлықларға жәрийма, ҳәкимшилик ямаса жынайый жуўапкершилик шараларының қолланылыўы рейтинг баллының төменлеўи, товар белгилери ҳәм хызмет көрсетиў белгилери болса қосымша балл бериўши көрсеткиш есапланады;
ИМ объектлерине қорғаў ҳүжжетлериниң (гүўалық, патент) дубликатларын төлемли түрде онлайн режимде бериў тәртиби енгизиледи.
Ҳүжжетке муўапық, жоқары билимлендириў, илимий-изертлеў мәкемелери, технопарклерде технологиялар ҳәм инновацияларды қоллап-қуўатлаў орайларын шөлкемлестириў, "Интеллектуаллық мүлк тараўын раўажландырыўға қосқан үлеси ушын" көкирек белгисин шөлкемлестириў нәзерде тутылған.
Ойлап табыўшылар ҳәм новаторларға қолайлы шараятлар жаратыў, оларды хошаметлеў, сондай-ақ, илимий қолланбалардың пуқаралық айланыстағы айланысын арттырыў мақсетинде:
ИМ объектлерине болған ҳуқықлардан кредит алыў ушын гиреў сыпатында пайдаланыў мүмкин;
ИМ объектлериниң гиреўи ҳаққындағы шәртнамалардың есабы Әдиллик министрлигинде жүргизиледи;
2026-жылдан баслап ҳәр жылы "Ең жақсы ойлап табыў", "Ең жақсы пайдалы модель", "Ең жақсы санаат үлгиси", "ЭЕМ ушын ең жақсы бағдарлама ҳәм мағлыўматлар базасы", "Ең жақсы селекциялық жетискенлик" номинациялары бойынша республикалық таңлаў өткериледи.
Таңлаў жеңимпазларына ҳәр бир номинация бойынша 1, 2 ҳәм 3-орынлар ушын Илимди қаржыландырыў ҳәм инновацияларды қоллап-қуўатлаў қорының қаржылары есабынан тийислисинше БЕМның 150, 125 ҳәм 100 есеси муғдарында сыйлық төленеди.
Интеллектуаллық мүлк тараўын буннан былай да жетилистириў, тараўға заманагөй мәлимлеме-коммуникация технологияларын кеңнен енгизиў бойынша "Жол картасы" тастыйықланды.
Ҳүжжет Нызамшылық мағлыўматлары миллий базасында жәрияланған ҳәм 28.11.2025-жылдан күшке кирди, деп жазады «Norma».
