Илаж Президент Шавкат Мирзиёевтиң 2024-жыл сентябрь айында Астана қаласында болып өткен "Орайлық Азия - Германия" саммитинде алға қойған басламасын әмелге асырыў шеңберинде өткерилмекте.
Илаж Өзбекстан Республикасы Президенти жанындағы Стратегиялық ҳәм регионлараралық изертлеўлер институты, Конрад Аденауэр фондының Орайлық Азия бойынша регионаллық ўәкилханасы ҳәм Фридрих Эберт фондының Өзбекстандағы ўәкилханасы тәрепинен шөлкемлестирилди.
Форум Германия ҳәм Орайлық Азия мәмлекетлериниң жетекши таллаў орайларының басшылары, абырайлы экспертлер, илимий-билимлендириў топарлары ҳәм бизнес жәмийетшилигиниң ўәкиллеринен ибарат 50 ден аслам қатнасыўшыны өз ишине алады.
Ушырасыўдан мақсет - "Орайлық Азия + Германия" форматын сапалы аналитикалық қоллап-қуўатлаўды тәмийинлеўге қаратылған турақлы жумыс алып баратуғын эксперт платформасын иске қосыўдан ибарат.
Сиясий сөйлесиўди тереңлестириў ҳәм экономикалық кооперация ҳәм санаат шериклигин раўажландырыў, санлы трансформацияны жеделлестириў, академиялық алмасыўлар ҳәм шөлкемлескен мийнет миграциясын раўажландырыў арқалы инсан капиталына инвестицияларды тартыў мәселелери додаланыўдың тийкарғы бағдарлары болып есапланады.
