Атап өтилиўинше, келисимлерге Экология министриниң орынбасары Жусипбек Казбеков, "Vision International Investment" компаниясының раўажланыў бойынша бас директоры Капил Лалвани ҳәм "Suez International" компаниясының Европа ҳәм Орайлық Азия бойынша бас директоры Паул Боурдиллон қол қойды.

Бул келисим қәўипли санаат шығындыларын басқарыў бойынша перспективалы жойбарды ислеп шығыў ҳәм әмелге асырыў бойынша бирге ислесиўди нәзерде тутады. Жойбардың улыўма баҳасы 78 миллион АҚШ долларына тең болып, үш басқышта әмелге асырылады. Биринши басқышта шығындыларды турақластырыў ҳәм полигонларға жайластырыў комплекслери және регионаллық узатыў станцияларын жаратыў нәзерде тутылған болса, екинши басқышта шығындыдан жанылғы алыў (РДФ - Рефусе-деривед фуэл) үскенеси, жағыў имаратлары ҳәм ыссылық пенен қайта ислеў кәрханасының инженерлик алды жойбарын ислеп шығыў ҳәм тәжирийбе тийкарында сынақтан өткериў режелестирилген. Үшинши басқышта болса толық көлемде шығындыдан жанылғы алыў, ыссылық пенен қайта ислеў имаратын қурыў ҳәм иске қосыў мақсет етилген.

Мағлыўмат ушын, "Suez International" тийкарынан суў ҳәм шығындыларды басқарыўға қәнигелескен, 160 жылдан аслам тарийхқа ийе Франция компаниясы болып есапланады. Ол пүткил дүньяда суў тәмийнаты ҳәм тазалаў, ақаба суўларды басқарыў, сондай-ақ шығындыларды қайта ислеў, соның ишинде, қәўипли шығындыларды басқарыў бойынша шешимлер усыныс етеди. Компания Европа, Азия-Тыныш океаны регионы, Америка, Африка ҳәм Жақын Шығыс регионларында көплеген санаат тармақларына хызмет көрсетеди.

"Vision International Investment Company" (ВИИC)2002-жылы Саудия Арабстанында шөлкемлестирилген ири инвестициялық холдинг болып, 96 миллиард АҚШ доллары әтирапындағы активлерди басқарады. Жумыс бағдарлары энергетика, инфраструктура, коммуналлық хызметлер, суў ресурсларын басқарыў, электр энергиясын ислеп шығарыў, консалтинг ҳәм мәмлекетлик-жеке меншик шериклик жойбарларын қамтып алады.

Бул келисимлер стратегиялық бирге ислесиўди тереңлестириў ҳәм, әлбетте, экологиялық жағдайды жақсылаўға хызмет етеди.