Дәслеп Өзбекстан Республикасы Президенти Шавкат Мирзиёевтиң Баспасөз ҳәм ғалаба хабар қуралларының хызметкерлерине жоллаған қутлықлаўын Өзбекстан Республикасы Президентиниң Баспасөз хаткери Шерзод Асадов оқып еситтирди.
Медиа тараўы ўәкиллериниң кәсиплик байрамы алдынан Өзбекстан Республикасы Президентиниң "Баспасөз ҳәм ғалаба хабар қураллары хызметкерлери күни мүнәсибети менен тараў хызметкерлеринен бир топарын сыйлықлаў ҳаққында"ғы пәрманы қабыл етилди. Оған бола, Жаңа Өзбекстанда ерисилип атырған үлкен жетискенликлерди кеңнен үгит-нәсиятлаўдағы үлкен хызметлери, жоқары маманлықтағы, заманагөй журналист кадрларды таярлаў, жас әўладты ўатанға муҳаббат ҳәм садықлық руўхында тәрбиялаўдағы нәтийжели жумысы және жәмиетлик турмыста белсене қатнасқаны ушын бир топар кәсиплеслеримиз Ўатанымыздың жоқары атақлары, орден ҳәм медаллары менен сыйлықланды.
Салтанатлы илажда Өзбекстан Республикасы Олий Мажлиси Сенатының Баслығы Танзила Норбоева әне усы сыйлықларды өз ийелерине тапсырды.
Сондай-ақ, салтанатлы илажда "Алтын қәлем" Миллий сыйлығы шөлкемлестириў комитетиниң баслығы, Өзбекстан Журналистлер аўқамының баслығы ўазыйпасын атқарыўшы Холмурод Салимов мәмлекетимизде Президент Шавкат Мирзиёевтиң басшылығында мәлимлеме тараўында кең көлемли реформалар алып барылып атырғаны, журналистлердиң жәмиеттеги белсендилигин арттырыў, оларды қоллап-қуўатлаў ҳәм хошаметлеўге айрықша итибар қаратылып атырғанына тоқтап өтти, быйылғы "Алтын қәлем" сыйлығы ҳаққында мағлыўмат берди.
Бул таңлаўда “Янги Ўзбекистон“ газетасы бөлим редакторы Юнус Бўронов "Алтын қәлем" ХIХ Миллий сыйлығы ушын халықаралық таңлаўдың Баспа басылымлар бағдары бойынша "Ең жақсы журналистлик материал ушын" 1-орын ийеси болды.
