Әлемдегі қиын жағдайға қарамастан, ішкі мүмкіндіктерді пайдалану есебінен, соңғы 9 айда ел экономикасы 6,6 пайызға, өнеркәсіп 7 пайызға өсті. Жыл соңына дейін кемінде 6 пайыз өсім күтілуде.
Алтын-валюта қоры биыл алғаш рет 40 миллиард доллардан асты. Халықтың ұлттық валютадағы депозиттері 50 пайызға өсті.
Әлемнің беделді рейтингтік агенттіктері де Өзбекстанның рейтингі тұрақты сақталып отырғанын оң бағалап отыр. Шетелдік инвесторлардың сенімінің артуы арқасында халықаралық нарықтарда 4 миллиард долларлық еуробонд орналастырылды.
Осының нәтижесінде биылғы жылы инвестициялардың жалпы ішкі өнімдегі үлесі 33 пайыздан асады. Экспорт шамамен 19 пайызға өсуі күтілуде.
Жалпы, Халықаралық валюта қоры, Дүниежүзілік банк және Азия даму банкі белсенді инвестициялық саясат пен реформалар есебінен Өзбекстанда алдағы уақытта да тұрақты экономикалық өсім сақталатынын растауда.
Сонымен бірге, әлемдік нарықтардағы бәсекелестіктің күшеюі және шикізат бағасының жиі өзгеруі жағдайында өнеркәсіпте және экспортта жоғары қосылған құнды өнімдерді көбейту қажеттігі атап өтілді. Осы тұрғыда жауапты тұлғаларға әр сала бойынша қосылған құн тізбегі мен еңбек өнімділігін арттыруға бағытталған үш жылдық бағдарлама әзірлеу тапсырылды.
Осы мәселелерді талқылау барысында экономика мен инвестиция саласындағы негізгі міндеттер қарастырылды.
Негізгі салық мөлшерлемелері өзгеріссіз қалған жағдайда бюджеттің кірісін арттырудың жалғыз жолы — салық әкімшілігін жетілдіру екені атап өтілді.
Мемлекет басшысы бұл кәсіпкерлердің ісіне араласу арқылы емес, цифрландыру, жасанды интеллект пен көлеңкелі экономиканы заңды негізге шығару есебінен жүзеге асуы керектігін атап өтті.
Халықаралық қаржы ұйымдары мен басқа да серіктестерден тартылған жеңілдікпен алынған қаражаттың тиімділігіне ерекше назар аударылды.
Жиналыста 2025 жылға арналған экономикалық жоспарлар да қаралды.
Алдағы жылы жалпы ішкі өнімнің өсуін сақтау үшін барлық мүмкіндік бар екені атап өтілді. Бұл үшін жоспарланған жобаларды уақытында іске қосу, көлік-логистика, ақпараттық технологиялар, агро және қаржылық қызметтерді дамыту талап етіледі.
Жеңілдіктердің тиімділігін қарау және көлеңкелі экономиканы қысқарту бойынша тапсырмалар берілді.
Қол жеткізілген мүмкіндіктер есебінен келесі жылы 78 аудан бюджет шығынын өзі өтей алатын деңгейге өтеді. Бұл үшін жер, мүлік және айналым салығы толық, ал табыс салығының 50 пайызы сол аудандарда қалдырылады.
Әлеуметтік мемлекет қағидасына сәйкес, білім беру мен денсаулық сақтау салаларына бөлінетін қаржыны 20 пайызға арттыру көзделіп отыр.
Жиналыста айтылған пікірлер негізінде 2025 жылғы Мемлекеттік бюджет жобасының негізгі бағыттары айқындалды.
Заңнамаға сәйкес, бұл жоба және оның орындалуын қамтамасыз ету шаралары жергілікті Кеңестерде талқыланып, соңында Олий Мажлис Заң палатасына ұсынылады.
