Жиналыста жауапты кісілерге алдағы екі жыл ішінде 66 мың гектар жерде азық-түлік, мейіз және өндірістік жүзім плантациясын құру және жүзім алқаптарының жалпы аумағын 150 мың гектарға дейін ұлғайту, жыл соңына дейін 15700 га жүзім алқаптарына тамшылатып суару әдісін енгізу және 1 мың артезиан құдық қазу міндеті жүктелді.

Жүзім өсіру көлемін ұлғайту үшін тұрғын үйді кеңірек пайдалану жүйесін енгізу қажет екендігі айтылды.

Мысалы Әндіжан облысының Бұлақбасы ауданында биыл 1000 үйге несие алуға 7 миллиард сум бөлініп, қосымша 5000 тонна жүзім мен 15 миллиард сум табыс көзі жасақталды. Ауданның кейбір жерлерінде бір қарыс бос жерді көрмейсіз, барлық жерге жүзім егілген.

Осы тәжірибені елдің басқа аймақтарындағы 40 мың үй шаруашылығына енгізу арқылы қосымша 3 мың гектар жаңа жүзім алқаптарын құруға және жүзім өсіру көлемін үш есеге арттыруға болады.

Бұл жұмысты жыл соңына дейін барлық аудандар мен қалаларға енгізу, сонымен қатар әр үйде кемінде 15-20 дана жүзім өзгеше әдіспен яғни «жоғарғы жағында жүзім - төменде көкөністер» отырғызуды ұйымдастыру тапсырылды.

Жиында шетелден келген ғалымдармен және консультанттармен жеке серіктестік негізінде заманауи питомник кешендерін құру, жүзімнің жоғары өнімді, аязға төзімді және ауруға төзімді жаңа сорттарын құру бойынша Ресей, Чили және басқа да жетекші елдердің ғылыми орталықтарымен ынтымақтастық орнату және Венгрияның жетекші университеті мен Ферғана мемлекеттік университеті арасында бірлескен факультет құру бойынша міндеттер қойылды.

Сонымен қатар, жүзімнің өңделуі мен дайын өнімге айналуының толық циклын құру мақсатында шарап жасау кластерлер жүйесі құрылады. Атап айтқанда, Фориш, Алтынсай, Иштихон және Янгиабад аудандарында жүзім өсіруге арналған алғашқы 4 ірі кластер құрылады.

Мейізді кептіру және орау желілері құрылысының құнынан 20% дейін субсидия бөлінеді. Сонымен бірге табиғи шараптарға салынатын акциз салығы жойылады.