Янги нашрдаги изоҳли луғат бўйича кўпчиликни қизиқтирган савол, яъни нашрнинг аввалгиларидан фарқли жиҳатлари юзасидан филология фанлари доктори, профессор Ёрқин Одилов шундай деди:
— Аввало, бир қарашда кўринадиган ёзувдаги фарқ. Қолаверса, халқимиз қўллаб келган, лекин қандайдир сабабларга кўра луғатларга кирмай қолган сўзлар имкон қадар янги нашрга киритилди. Шунингдек, шевага оид сўзларнинг ҳам изоҳли луғат принципларига мос келадиган, кейин оммалашиши мумкин бўлганлари луғатдан жой олди. Бундан ташқари, луғатга адабий тилда яқин 5-10 йилларгача бўлмаган “эҳтиёжманд”, “манзилли” каби янги сўзлар қўшилди. Луғат лексикасини бойитишда шунингдек, аввалги нашрларга кирмай қолган тарихий, диний исломий лексикага оид бўлган сўзлардан ҳам фойдаланилди.
Хулоса қилиб айтганда, 400 га яқин тарихий манбалар, 1800 дан ортиқ фраземалар билан бойитилган, умумий ҳисобда 5000 га яқин сўз қўшилган 630 бетли янги луғат аввалги 350 бетлик луғатдан анча бой, дейишга асос бор.
Муножат Мўминова
