Бояд гуфт, ки бемории сил беморииест, ки ба саломатии инсон хатар дорад ва бинобар оқибатҳои марговарӣ дар байни бемориҳои сироятӣ дар ҷои дуюм аст. Тибқи маълумоти СУТ, ҳамасола дар саросари ҷаҳон тақрибан 10 миллион нафар ба бемории сил гирифтор мешаванд, ки беш аз 1,5 миллион нафари онҳо мемиранд. Ин рақам дар натиҷаи пандемияи COVID-19 боз афзоиш ёфтааст. Ҳамасола дар Ӯзбекистон ҳудуди 25 ҳазор нафар ба бемории сил мубтало мешаванд.
То ҳол ягон давои самарабахши бемории сил ихтироъ карда нашудааст. Аксари доруҳое, ки имрӯз истифода мешаванд, ним аср пеш офарида шудаанд ва як қатор камбудиҳо доранд. Хусусан, таъсири манфии онҳо ба бадан он қадар зиёд аст, ки ҳангоми табобат боиси бемориҳои иловагӣ мешаванд.
Чунин доруҳо дар бадани инсон на бештар аз 3-6 соат амал мекунанд ва барои нигоҳ доштани консентратсияи табобатӣ бояд дар як рӯз чанд маротиба истеъмол карда шаванд. Ин дар навбати худ ҳолатҳои мухталифи заҳру-аллергиро пеш меорад, хабар медиҳад ӮзА.
“Биомайрин 600 мг”, ки аз ҷониби олимони ватанӣ офарида шудааст, хусусияти макромолекулярӣ дошта, бо макромолекулаи полимери табиии кислотаи полигалактуронӣ тавассути пайвандҳои кимиёвии изониазид, этамбутол ва рифампитсин алоқаманд аст. Дар натиҷа, таъсири манфии дигар доруҳо бар зидди ин беморӣ якчанд маротиба кам шуда, давомнокии таъсири самарабахш дар организм хеле зиёд шуд.
Дору ба ҳуҷайраҳои патогенӣ таъсири мақсаднок мерасонад ва ба муқобили штаммҳои гуногуни сил дараҷаи баланди муқовимат дорад.
