Samarqand va Jizzax viloyatining olis va chekka hududlarda joylashgan maktab oʻquvchilari uchun bepul avtobus qatnovi yoʻlga qoʻyiladi.
Bu haqda 2025-yil uchun davlat dasturi loyihasida koʻzda tutilgan.
Qayd etilishicha, Samarqand va Jizzax viloyatlaridagi 100 ta umumiy oʻrta taʼlim maktabida olis hududlardan qatnaydigan oʻquvchilarni avtobuslar bilan maktabga qatnovi autsorsing asosida tashkil etiladi.
Shuningdek, “El-yurt umidi“ jamgʻarmasi koʻmagida har yili 20 nafar maktabdan tashqari taʼlim tashkilotlari oʻqituvchi-trenerlari xorijiy davlatlarga malaka oshirish uchun yuboriladi.
Agar oilaning barcha aʼzolari “ekofaol fuqaro” maqomini olsa, bu oilaga “Yashil oila” maqomi beriladi hamda har yili lotereya orqali aniqlangan oilalarga elektromobil sovgʻa qilinadi.
2025-yil 1-iyulga qadar Sanitariya-epidemiologik osoyishtalik va jamoat salomatligi qoʻmitasining laboratoriyalarini oziq-ovqat mahsulotlari tarkibidagi transyogʻlarni aniqlash uchun zarur jihozlar bilan taʼminlash choralari koʻriladi.
Jamoatchilik muhokamasi uchun “Oʻzbekiston — 2030” strategiyasi doirasida atrof-muhitni muhofaza qilish va “yashil” iqtisodiyot yilida (2025-yil) davlat dasturini amalga oshirish toʻgʻrisidagi Prezident farmoni loyihasi eʼlon qilindi.
Davlat dasturi loyihasida 5 ta ustuvor yoʻnalish boʻyicha 2025-yil uchun amaliy chora-tadbirlar, normativ-huquqiy hujjatlar roʻyxati va maqsadli koʻrsatkichlar nazarda tutilmoqda.
