Oʻzbekiston Respublikasi Prezidentining “Oʻzbekiston–2030 strategiyasini Atrof-muhitni asrash va yashil iqtisodiyot yilida amalga oshirishga oid davlat dasturi toʻgʻrisida”gi farmoni loyihasi jamoatchilik muhokamasiga qoʻyildi.
Loyihaga koʻra, 2025-yil 1-sentabrdan boshlab tadbirkorlik subyektlarini “yashil tadbirkor” sifatida eʼtirof etishga qaratilgan platforma ishga tushirilishi koʻzda tutilmoqda.
Jumladan:
- koʻkalamzorlashtirish, jumladan, korxonani “yashil belbogʻ” bilan oʻrash, sugʻorish tizimlarini oʻrnatish, tomchilatish, yomgʻirlatish va konteynerli (qopli) sugʻorish tizimini joriy qilish;
- energiya tejamkorligi, jumladan, energiya tejovchi uskunalar va texnologiyalarni joriy qilish;
- korxonaning atrof-muhitga taʼsirini kamaytirish, jumladan, ekologik huquqbuzarlik sodir etmaslik, atmosferaga tashlamalarni onlayn monitoring qilish tizimini joriy etish;
- ishlab chiqarishga sirkulyar iqtisodiyotni joriy qilish (“7R”) tamoyilini tatbiq etish kabi koʻrsatkichlarni bajargan tadbirkorlik subyektlariga “yashil tadbirkor” maqomini beriladi.
Shuningdek, “yashil tadbirkor” maqomini olgan tadbirkorlik subyektlariga:
- “Shaffof qurilish” platformasida ustuvorlik beriladi;
- muayyan muddat davomida ekologik tekshiruvlardan ozod etiladi;
- xalqaro bozorlarga chiqish uchun qoʻllab-quvvatlanadi;
- Tadbirkorlik subyektlarining barqarorlik reytingi doirasida qoʻshimcha ball beriladi.
Loyihada aholi va tadbirkorlik subyektlari tomonidan qayta tiklanuvchi energiya manbalaridan keng foydalanishni ragʻbatlantirish maqsadida 2025-yil 1-apreldan boshlab chiqindilar utilizatsiyasi hisobiga hamda shamol va quyosh manbalaridan ishlab chiqarilgan elektr energiyasi uchun “yashil tarif”lar joriy etilishi ham koʻzda tutilmoqda. Bunda:
- tadbirkorlik subyektlari tomonidan chiqindi va biogaz utilizatsiyasi orqali ishlab chiqariladigan hamda tashkilotlarning oʻz hududlarida oʻrnatgan shamol va quyosh elektr qurilmalaridan ishlab chiqariladigan elektr energiyasi;
- aholining quyoshdan olingan va foydalanishda oʻz ehtiyojidan orttirib, davlatga sotadigan elektr energiyasi uchun imtiyozli tariflar belgilanadi.
