Adliya vazirligi jamoatchilik bilan aloqalar bo‘limidan olingan maʼlumotga ko‘ra, xorijiy ekspertlar, Tadbirkorlik kodeksi loyihasini ishlab chiqish uchun shakllantirilgan ishchi guruh aʼzolari ishtirok etgan ushbu seminarda tadbirkorlik subyektlarini kichik, o‘rta va yirik toifalarga ajratishning o‘ziga xos xususiyatlari va tadbirkorlik subyektlarining tashkiliy-huquqiy shakllari mavzulari atroflicha muhokama qilindi.
Tadbirkorlik kodeksi loyihasini ishlab chiqishga 3 yilga yaqin vaqt sarflandi. Loyihani ishlab chiqishga nafaqat milliy ekspertlarimiz, balki xalqaro ekspertlar ham jalb qilindi, hujjat 5 oydan ortiq jamoatchilik muhokamasidan o‘tkazildi.
Aynan tadbirkorlarning takliflari, ularni qiynab kelayotgan tizimli muammolarni o‘rganish uchun respublika darajasida ishchi guruhlar tashkil etilib, respublikamizning barcha hududlarida tadbirkorlar bilan Kodeks loyihasi muhokama qilindi.
Jamoatchilik, tadbirkorlar va soha ekspertlari bilan o‘tkazilgan muhokamalar natijasida 1500 ga yaqin takliflar kelib tushdi hamda loyihada korrupsiyaviy omillarning mavjudligi, gender tenglikka taʼsiri va boshqa masalalar bo‘yicha o‘tkazilgan so‘rovnomalarda 1200 dan ortiq fuqaro ishtirok etdi.
Kelib tushayotgan takliflar asosan, tadbirkorlikni qo‘llab-quvvatlash, kredit ajratish, tekshiruvlar, soliq sohasiga taalluqlidir.
Bundan tashqari, Kodeks loyihasi 8 ta yetakchi xalqaro tashkilotlarga, jumladan, USAID, Jahon banki, Osiyo taraqqiyot banki, Yevropa tiklanish va taraqqiyot banki, Xalqaro moliya korporatsiyasi, Germaniyaning «Berlin Economics» iqtisodiy guruhi, Iqtisodiy hamkorlik va taraqqiyot tashkilotiga taqdim etilgan bo‘lib, ushbu tashkilotlardan ekspertiza natijalari bo‘yicha xulosa va takliflar kelib tushdi.
Bugungi kunda ushbu takliflar asosida Tadbirkorlik kodeksi loyihasi mutaxassislar tomonidan maromiga yetkazilmoqda.
Kodeksni ishlab chiqishda asosiy urg‘u tadbirkorlik sohasida yagona yondoshuvni belgilashga, tadbirkorning huquqiy himoyasiga, byurokratiya va maʼmuriy yukni, shu jumladan, davlat organlarining biznesga aralashuvini keskin kamaytirishga hamda biznes vakillarini qo‘llab-quvvatlashga qaratildi. Xususan:
– tadbirkorlik faoliyatini tartibga soluvchi 16 ta asosiy tamoyillar, jumladan, tadbirkorlikning erkinligi, tadbirkorlar faoliyatiga davlatning noqonuniy aralashishiga yo‘l qo‘ymaslik, tadbirkorlik subyektlari huquqlarining ustuvorligi belgilandi;
– tadbirkorlik subyektlari kichik, o‘rta va yirik toifalarga ajratildi;
– tadbirkorlar faoliyatidagi amaldagi tekshiruvlar soni 2 baravar qisqartirilib, Kodeks bilan tekshiruvlarning qatʼiy ro‘yxati belgilandi;
– tadbirkorlikk davlat tomonidan aralashuv keskin qisqartirilib, uning aniq chegaralari belgilandi.
