Бүгінде мыс өнеркәсіп, энергетика, электротехника, цифрлық экономика және «жасыл» даму үшін стратегиялық маңызы жоғары шикізатқа айналып отыр. Осыған байланысты елімізде геологиялық барлау жұмыстарын кеңейтуге, қолдағы қорларды тиімді игеруге, шикізатты терең өңдеуге және жоғары қосылған құны бар өнімдер шығаруға ерекше назар аударылып отыр.
Биыл наурыз айында Алмалық тау-кен металлургия комбинаты құрамындағы 3-мыс байыту фабрикасының алғашқы кезеңі іске қосылған болатын. «Ёшлик-1» кен орнын игеру бағдарламасы аясында 196 гектар аумақта салынып жатқан бұл жобаның құны 2,7 миллиард долларды құрайды. Фабрика толық қуатына шыққаннан кейін жылына 60 миллион тонна руда өңдеп, шамамен 900 мың тонна мыс концентратын өндіруге мүмкіндік туады.
Бүгінгі таныстырылым барысында фабриканың келесі кезеңдерін іске қосу, технологиялық үдерістерді тұрақты жолға қою және жоспарланған өндірістік қуаттарға уақытылы шығу бағытында атқарылып жатқан жұмыстар туралы мәлімет берілді.
Атап айтқанда, ұсақтау цехындағы шарлы диірмендер мен флотациялық желілерді кезең-кезеңімен толық қуатқа шығару бойынша нақты кесте бекітілген.
Жыл соңына дейін 3-мыс байыту фабрикасында руданы қайта өңдеу көлемін ұлғайту, негізгі технологиялық тізбектерді толық іске қосу және өндіріс тұрақтылығын қамтамасыз ету міндеті жүктелді.
3-мыс байыту фабрикасы толық іске қосылғаннан кейін комбинаттағы мыс концентратын тәуліктік өндіру көлемі 2 мың 400 тоннадан 5 мың тоннаға дейін ұлғаяды деп жоспарланып отыр. Заманауи технологияларды енгізу арқылы энергия шығыны мен өндіріс құнын азайтып, еңбек өнімділігін арттыруға мүмкіндік туады.
Таныстырылым барысында 4-мыс байыту фабрикасы жобасын әзірлеу жұмыстарын жеделдету мәселесі де қаралды.
Қазіргі таңда жоба аясында базалық инженерлік құжаттар дайындалып, құрылыс алаңында жер жұмыстары мен геологиялық бұрғылау жұмыстары жүргізілуде.
Бұл жобада 3-фабриканың тәжірибесін ескере отырып, технологиялық шешімдерді оңтайландыруға, энергия және су ресурстарын үнемді пайдалануға ерекше көңіл бөлінуде.
Сонымен қатар халықаралық инженерлік компаниялармен бірлесіп гравитация, флотация, концентратты кептіру және қалдықтарды қоюландыру бағытындағы технологиялық тізбектерді жетілдіру, сондай-ақ шетелдік қаржы институттарынан инвестиция тарту үшін жобаның техникалық-экономикалық негіздемесін әзірлеу шаралары белгіленді.
Жауапты тұлғаларға 4-мыс байыту фабрикасына қажетті жер телімдерін бөлу, құрылыс алаңындағы дайындық жұмыстарын жалғастыру, базалық инженерлік құжаттарды белгіленген мерзімде аяқтау және жобаны кезең-кезеңімен іске қосу жоспарын нақтылау жөнінде тапсырмалар берілді.
