Регламентке бола, автотранспорт қуралларын майыплығы болған шахслардың мүтәжликлерине бейимлестириў қәрежетлериниң 50 проценти, бирақ БЕМниң 30 есесине шекемги бөлеги қаплап бериледи.
Онда қәрежетлер 2024-жыл 1-октябрьге шекем қалалық, қала әтирапы, қалалараралық автобуста жолаўшы тасыў жөнелислерин бириктириў бойынша тендерде жеңимпаз болып, усы жөнелислерде хызмет көрсеткен исбилерменлердиң ҳәр бир автобусы ушын қапланады.
Сондай-ақ, 2024-жыл 1-ноябрьден I топар майыплығы болған шахслардың өз атына рәсмийлестирилген ҳәм жеке пайдаланыўында болған 1 автотранспорт қуралы ушын әмелге асырылады.
Автотранспорт қуралларын төмендегилер менен үскенелеў оны майыплығы болған шахслардың мүтәжликлерине бейимлестириў деп тән алынады:
исбилерменлердиң автобуслары ушын:
- жыйналатуғын пандус (1 дана);
- аудио ҳәм визуал информация бериўши монитор (1 дана);
- хабар бериўши колонка (көби менен 3);
- мағлыўматларды жеткерип бериўши микрофон (1 дана);
- байланыс түймеси;
- станциялар ҳаққында мағлыўмат алыў имканиятын беретуғын мағлыўматлар тахтасы менен үскенелеў (1 дана);
I топар майыплығы болған шахслардың жеке автотранспорт қураллары ушын:
- газ ҳәм тормоз педалын қол басқарыўына өткериў;
- механикалық узатқышты автомат узатқышқа айландырыў қәрежетлери.
Арза бериўшилер автотранспорт қуралы талапларға бейимлестирилген ўақыттан баслап 90 күн ишинде "Инсан" орайларына ямаса "Бирден-бир миллий социаллық қорғаў" мәлимлеме системасы ямаса БИМХП (my.gov.uz) арқалы мүрәжат етиўи керек.
