Сапар етиў даўамында еки мәмлекет арасында қәўипсизлик тараўындағы өз-ара бирге ислесиўди беккемлеўге хызмет ететуғын нәтийжели сөйлесиў ҳәм тәжирийбе алмасыў болып өтти.
Ишки ислер министри Азиз Тошпўлатов Қытай жәмийетлик қәўипсизлик министри Ван Сяохун менен еки тәреплеме ушырасыў өткерди. Сөйлесиўде әмелий бирге ислесиўди беккемлеў, трансмиллий жынаятшылық ҳәм мәлимлеме технологиялары тараўындағы жынаятларға қарсы гүресиў, жәмийетлик тәртипти тәмийинлеў, тәжирийбе алмасыў ҳәм кадрлар таярлаў перспективалары додаланды.
Сапар бағдарламасына муўапық делегация ағзалары ҚХР Жәмийетлик қәўипсизлик министрлигиниң Биринши изертлеў институтында болып, қәўипсизлик, санлы технологиялар ҳәм мәлимлеме базаларын басқарыў системалары тараўындағы илимий-әмелий қолланбалар менен танысты.
Институт қәнигелери инновациялық бағдарламалар, интеллектуаллық видеоанализ, сондай-ақ, излеў ҳәм оператив-излеў жумысы ушын исленбелер тараўындағы жетискенликлерди көрсетти.
Кибержынаятшылыққа қарсы гүресиў басқармасына айрықша итибар қаратылып, глобал киберҳүжимлер, электрон алдаўшылық қәўип-қәтерлери, жеке мағлыўматлар қәўипсизлиги ҳәм санлы экономиканы қорғаў мәселелери додаланды. Қытай тәрепи Өзбекстанда киберқәўипсизликти жетилистириў ушын бейимлестирилиўи мүмкин болған киберқәўип-қәтерлерди ерте анықлаў платформалары, электрон төлемлердеги алдаўшылыққа қарсы гүресиў технологиялары, интернет мониторинги ҳәм қәўип-қәтер қәўиплерин баҳалаў системаларын усынды.
Сондай-ақ, делегация Пекиндеги Жәмийетлик қәўипсизлик бюросының Ҳуқық қорғаў ҳәм тергеў ҳәрекетлери орайында болып, жынайый ўақыяларды санлы моделлестириў, жаңа түрдеги криминалистикалық экспертизалар, ҳүжжетлер ҳәм аудио-видео дәлиллерди автоматластырылған түрде таллаў менен танысты.
ҚХР Жәмийетлик қәўипсизлик университетинде кадрлар таярлаўдың заманагөй модельлери, оқыў курслары ҳәм әмелий сабақларды шөлкемлестириў тәжирийбеси үйренилди.
Сапардың кейинги басқышы Гуандун провинциясында болып өтти. Ўәлаяттың Жәмийетлик қәўипсизлик департаментиде делегацияға регионаллық қәўипсизликти тәмийинлеў, жәмийетлик тәртипке қәўип-қәтерлерди мониторинг етиў, жол ҳәрекети қәўипсизлиги ҳәм оператив орайларды басқарыў системалары ҳаққында мағлыўмат берилди.
Шэньчжэнде делегация техникалық инфраструктураның заманагөй объектлери: ушыўшысыз ушыў аппаратлары бөлими, Полицияның авиация басқармасы, Басқарыў ҳәм оператив мониторинг орайы, сондай-ақ, Кибералдаўшылыққа қарсы гүресиў орайы менен танысты, бул жерде санлы қәўип-қәтерлерден қорғаныў ушын жоқары технологиялық шешимлер көрсетилди.
Буннан тысқары, делегация 15-Пүткилқытай спорт ойынларының жабылыў мәресиминде қатнасты ҳәм ғалабалық илажларда қәўипсизликти тәмийинлеў модели менен танысты.
Сапардың жуўмақлаўшы бөлиминде делегация Huawei компаниясының «Songshan Lake» илимий-технологиялық кампусында болды, бул жерде қәнигелер интеллектуаллық қадағалаў ҳәм мониторинг платформалары, мәлимлеме қәўипсизлиги шешимлери, полиция системасы ушын санлы басқарыў платформалары ҳәм жәмийетлик қәўипсизлик тараўында жасалма интеллект технологияларын көрсетти.
Бул сапар етиў Өзбекстан менен Қытай арасында қәўипсизлик тараўындағы бирге ислесиўди жаңа басқышқа алып шығыў, елимизде алдынғы тәжирийбе ҳәм заманагөй технологияларды енгизиўде үлкен әмелий әҳмийетке ийе болады.
