Өзбекстан делегациясының қурамында Өзбекстан Олий Мажлиси Нызамшылық палатасының депутаты Умид Ёқубхўжаев, "Өзатом" агентлиги дирекциясы директорының орынбасары Отабек Аманов, сондай-ақ, ЖДСШ экспертлери бар, деп хабар бермекте "Дунё" МА.
Сапар даўамында Венгрия Энергетика министрлиги жанындағы Энергетика стратегиясы институты, Венгрия атом энергиясы агентлиги, Венгрия халықаралық қатнасықлар институты, "Людовик" мәмлекетлик хызмет миллий университети, Венгрияның Климат сиясаты институты, Дунай институты, «MVM CEEnergy Zrt.» энергетика компаниясы ҳәм усы компанияның Энергетика системасын басқарыў орайының басшылары ҳәм экспертлери менен сөйлесиўлер өткерилди.
Сапар етиўдиң тийкарғы мақсети энергетикалық қәўипсизликти тәмийинлеў, энергия жеткерип бериўди диверсификациялаў ҳәм халықаралық бирге ислесиўди, соның ишинде, Орайлық Азияны раўажландырыў бойынша Венгрия тәжирийбесин үйрениў, кейин ала алынған билимлерден Өзбекстанда пайдаланыўдан ибарат.
Бағдарлама шеңберинде делегация "Людовик" мәмлекетлик хызмет миллий университети жанындағы Түркий дүньяны үйрениў орайының салтанатлы ашылыў мәресиминде де қатнасты. Өзбекстан делегациясы Венгрия, Әзербайжан, Қазақстан, Қырғызстан, Түркия ҳәм Өзбекстаннан келген халықаралық экспертлер менен бир қатарда түркий дүнядағы стратегиялық көзқарас, геосиясат ҳәм өз-ара байланыслылық мәселелерине бағышланған панель додалаўларында қатнасты.
Венгрияның мәкемелери ҳәм компаниялары менен сөйлесиўлерде энергетикалық қәўипсизлик, "жасыл" өтиў, энергия тәмийнаты дәреклерин диверсификациялаў ҳәм атом энергетикасын социаллық қоллап-қуўатлаўды раўажландырыў бойынша миллий стратегиялар таныстырылды. Венгриялы бирге ислесиўшилер Өзбекстан ҳәм Орайлық Азияның басқа да мәмлекетлери менен энергетика, академиялық алмасыўлар ҳәм биргеликтеги изертлеўлер тараўындағы бирге ислесиўди кеңейтиўден айрықша мәпдар екенин билдирди.
Сапар етиў өзбекстанлы экспертлерге Венгрияның энергетикалық қәўипсизликти тәмийинлеў, климат сиясатын раўажландырыў ҳәм халықаралық бирге ислесиў бағдарындағы прагматикалық көзқарасы ҳаққында баҳалы мағлыўмат алыў имканиятын берди, сондай-ақ, еки ҳәм көп тәреплеме бирге ислесиўди және де тереңлестириўден еки тәреп те мәпдар екенин тастыйықлады.
