Сессияға Россия Ҳүкимети Баслығының биринши орынбасары Денис Мантуров, Өзбекстан Бас министриниң орынбасары Жамшид Хужаев, сондай-ақ, Беларусь, Қазақстан, Тәжикстан ҳәм Евроазия экономикалық комиссиясының ўәкиллери қатнасты.
Форумның тийкарғы темасы - жаңа технологиялық хабларды қәлиплестириў ҳәм Евроазия санаат ландшафтын трансформациялаў.
Жамшид Хужаев өзиниң шығып сөйлеген сөзинде Президент Шавкат Мирзиёевтиң басшылығында Өзбекстан санаатластырыў бағдарын избе-из әмелге асырып атырғанын атап өтти. Мәмлекетимиздиң жалпы ишки өниминде санааттың үлеси 27 процентке жетти, жылдың жуўмағы бойынша прогноз етилип атырған экономикалық өсиў 6,8 процентти қурамақта.
Регионаллық кооперацияны раўажландырыўға айрықша итибар қаратылды. Өзбекстанның Орайлық Азия ҳәм Россиядан келген шериклер менен саўда көлеми 2025-жылдың жуўмағы бойынша 22 миллиард АҚШ долларына шамаласты. Елимизде дерлик 5,5 мың қоспа кәрхана жумыс алып бармақта, улыўма баҳасы 47 миллиард доллардан аслам 330 дан аслам жойбар әмелге асырылмақта.
Машина қурылысы, химия санааты ҳәм жаңа әўлад энергетикасы тийкарғы бағдарлар сыпатында көрсетип өтилди. Өзбекстан шийки зат моделинен жоқары қосымша қунлы өнимлер ислеп шығарыўға ҳәм турақлы өндирис шынжырларын қәлиплестириўге өтиўди даўам еттирмекте.
Көргизбе 22-апрельге шекем даўам етеди. 18 мың квадрат метр майданда Өзбекстан, Россия, Беларусь, Қытай ҳәм Қазақстанның 350 ге шамалас компаниясының қолланбалары орын алған.
Исбилерменлик бағдарламасында санластырыў, жасалма интеллект, экология, логистика, энергетика ҳәм кадрлар таярлаўға бағышланған 13 тематикалық сессия өткериледи. Илажда 30 мәмлекеттен 1500 ден аслам компания ҳәм делегатлар қатнаспақта.
