Мәмлекетимиз басшысы Брюссель қаласында Европа кеңесиниң Президенти Антониу Кошта ҳәм Европа комиссиясының Президенти Урсула фон дер Ляйен және Бельгиялылар Патшасы Филипп пенен нәтийжели сөйлесиўлер өткерди.
Шавкат Мирзиёев Өзбекстан ҳәм Европа Аўқамы арасында Кеңейтилген шериклик ҳәм бирге ислесиў ҳаққындағы тарийхый келисимге қол қойыў мәресиминде де қатнасты. Бул ҳүжжет өз-ара пайдалы бирге ислесиўди, бәринен бурын, саўда ҳәм инвестиция тараўларында кеңейтиў ҳәм беккемлеў ушын жаңа, кең көлемли ҳуқықый тийкар жаратады.
Мәмлекетимиз басшысы Европаның жетекши компаниялары ҳәм қаржы институтларының басшылары менен де ушырасыў өткерип, тийкарғы бағдарларда жаңа қоспа жойбарларды әмелге асырыў перспективаларын додалады.
Сапар даўамында Өзбекстанның Жәҳән саўда шөлкемине ағза болыўы бойынша Европа Аўқамы менен еки тәреплеме сөйлесиўлер жуўмақланғаны да мәлим етилди.
Бағдарламадағы илажлар жуўмақланғаннан соң, Президент Шавкат Мирзиёев Ташкент қаласына жөнеп кетти.
