Бағдарламаға муўапық, Исламабад қаласында Пакистан Президенти Асиф Али Зардарий, Бас министри Шаҳбоз Шариф, Қорғаныў күшлери Бас сәркардасы - Қураллы Күшлер қурғақлықтағы әскерлер сәркардасы фельдмаршал Асим Мунир менен сөйлесиўлер ҳәм Стратегиялық бирге ислесиў кеңесиниң биринши мәжилиси болып өтеди.
Өзбекстан менен Пакистан арасындағы стратегиялық шериклик ҳәм көп қырлы бирге ислесиў қатнасықларын және де беккемлеў мәселелери болажақ жоқары дәрежедеги сөйлесиўлердиң орайында болады.
Сиясий сөйлесиў, ҳүкиметлераралық, парламентлераралық, исбилерменлик ҳәм аймақлараралық байланысларды беккемлеўдиң әҳмийетли тәреплери ҳәр тәреплеме көрип шығылады.
Тәреплер товар алмасыўды көбейтиў, санаат, транспорт ҳәм инфраструктура, туризм тараўларында кооперациялық жойбарларды алға қойыў, мәдений-гуманитарлық бирге ислесиўди даўам еттириўге айрықша итибар қаратады.
Халықаралық ҳәм регионаллық әҳмийетке ийе актуал мәселелер бойынша пикир алысылады.
Сөйлесиўлер жуўмағында Биргеликтеги декларация ҳәм тийкарғы бағдарлардағы келисимлердиң салмақлы топламына қол қойылыўы күтилмекте.
Өзбекстан Президенти еки мәмлекет жетекши исбилермен топарлары ўәкиллериниң биргеликтеги бизнес форумында да қатнасады.
