Усы жылдың 29-январь күни Қарақалпақстан Республикасында инвестициялық жойбарларды жеделлестириў, экспортшы кәрханаларға әмелий жәрдем көрсетиў, машқалаларды сапластырыў ҳәм жаңа усыныслар ислеп шығыў мақсетинде исбилерменлик субъектлери менен ашықтан-ашық сөйлесиў өткерилди.
Ушырасыўда Бас министрдиң орынбасары - Ҳүкимет комиссиясының баслығы Жамшид Ходжаев, Бизнес-омбудсман Дилмурод Қосимов, Қарақалпақстан Республикасы Министрлер Кеңесиниң Баслығы Фарход Эрманов қатнасып, исбилерменлердиң усыныс ҳәм мүрәжатларын тыңлады.
Исбилерменлер тәрепинен көтерилген мәселелер, соның ишинде, инвестициялық жойбарларды әмелге асырыўдағы тосқынлықлар, экспорт жумысындағы машқалалар, мәмлекетлик уйымлар менен өз-ара бирге ислесиўдеги қыйыншылықлар ҳәм басқа да әҳмийетли мәселелер ҳәр тәреплеме додаланды.
Бизнес-омбудсман тәрепинен исбилерменлердиң мүрәжатлары бойынша оператив илажлар көриў, ҳуқықый мәсләҳәтлер бериў ҳәм әмелий жәрдем көрсетиў бойынша көрсетпелер берилди.
Машқалалы мәселелерди шешиў ушын жуўапкер шөлкемлер ҳәм уйымлар менен биргеликте жумыс алып барыў белгиленди.
