Экономикалық изертлеўлер ҳәм реформалар орайы көшпес мүлк базарындағы тенденциялардың жаңаланған анализин усынды.
2025-жыл август айының жуўмақларына бола, саўдалар өткен айға салыстырғанда 4,6 процентке төменлеп, 25 мың турақ жайды қурады. Бунда жыллық көринисте базар өсиўди көрсетпекте. Битимлер саны өткен жылдың август айына салыстырғанда 13 процентке көбейди.
Аймақлар кесиминде ең көп келисимлер Сырдәрья (34%), Хорезм (29%) ҳәм Сурхандәрья (27%) ўәлаятларында жүзеге келген.
Көшпес мүлктиң екинши базары
Өзбекстанның екилемши турақ жай базарында баҳалардың орташа динамикасы бақланбақта. Июль айында 1,7 процентке көтерилгеннен кейин август айында 1 квадрат метр ушын орташа базар баҳасы 1 процентке көтерилди. Жыллық көрсеткиште екилемши саўда баҳалары 4 процентке артты.
Аймақлар кесиминде айтқанда, өткен жылдың август айынан баслап турақ жай баҳасының ең көп өсиўи Жиззақ (14 процент), Сурхандәрья (17 процент) ҳәм Сырдәрья (10 процент) ўәлаятларында бақланған.
Ташкентте көшпес мүлк базарындағы жағдай
Август айында жыллық көрсеткиште екилемши базарда турақ жайлардың орташа баҳасы 2,3 процентке арзанлады. Соның менен бирге, пайтахтта бирлемши турақ жай баҳалары жыл даўамында орташа 0,7 процентке өскен.
Өткен айға салыстырғанда, Ташкент қаласында турақ жайлардың орташа баҳасы 0,2% ке азғана артты.
Екилемши турақ жайлар баҳасының ең көп төменлеўи Мырза Улығбек (-6,3%), Яшнабад (-4,4%) ҳәм Чиланзар (-4,6%) районларында бақланған. Соның менен бирге, жаңа қурылған жайлар сегменти бойынша баҳалардың ең көп көтерилиўи Миробод (6,6%), Яккасарай (3,6%) ҳәм Алмазар (2,6%) районларында бақланған.
Ташкент қаласында турақ жайды ижараға бериў базары анализи
Август айында Ташкентте ижара базары турақлылық көрсетип, орташа ставка алдынғы айлар дәрежесинде қалды ҳәм 1 кв.м ушын 8 долларды қурады.
Ең жоқары ижара ставкалары пайтахтымыздың Миробод, Шайхонтоҳур ҳәм Яккасарай сыяқлы орайлық районларында сақланып қалмақта, бул жерлерде орташа баҳа 1 квадрат метр ушын 10,3 доллар әтирапында.
Жыллық көрсеткиште Ташкент қаласында орташа ижара баҳасы 1,8% ке арзанлады. Ставкалардың ең көп төменлеўи Учтепа, Чиланзар ҳәм Бектемир районларында бақланған.
