Көз алдымдағы Үшинши Ренессанс Президентимиздиң басламасы менен басланған, өзинде тарийхымыз ҳәм келешегимиздиң аўырлығын жәмлеген үлкен тарийхый ўақыя болып есапланады. Бир тәрептен мине усындай тарийхый ўақыяға кирисиўдиң басланғыш дәўиринде жасап атырғанымыз, оған үлес қосыў имканиятымыз бар екениниң өзи айрықша мақтаныш бағышлайды. Ақыры бул күнлерди ата-бабаларымыз қанша ўақыт күткен еди?!
Мәмлекетимиз басшысы былай деген еди: "Ойлайман, тарийхта еки уллы Ренессанстың тийкары болған регионымызда Үшинши Ренессансты тап жадид бабаларымыз әмелге асырыўы мүмкин еди. Тилекке қарсы, өткир дүзим олардың ийгиликли идеялары ҳәм әмелий ҳәрекетлерин толық жүзеге шығарыўға имкан бермеди".
Бул тарийхый мақсетти әмелге асырыў бизиң шекимизге түсти. Бул ҳәр биримизге үлкен жуўапкершилик жүклейди. Себеби, мақсет оғада үлкен, оны әмелге асырыўда үлкен-киши барлық тәреплери есапқа алыныўы, заман менен үнлес барыўы, бәрқулла бағдарламалық болыўы керек. Мәмлекетимиз басшысының Олий Мажлис Сенатының биринши мәжилисиндеги шығып сөйлеген сөзин тыңлап, биз бул уллы мақсетке қарай жоқары пәт пенен баратырғанымызды, жолымыз дурыс екенин және бир мәрте аңладым.
Мәмлекетимиздиң раўажланыўы ушын коррупцияны пүткиллей сапластырыў оғада үлкен әҳмийетке ийе. Себеби, парахорлық, лаўазымынан пайдаланыў бар жерде раўажланыў болмайды. Соның ушын, мәмлекетимиз басшысы жумысының басынан-ақ бул иллетке қарсы аяўсыз гүресиў керек екенлигин атап өтеди. Жаңа қурамдағы парламент мәжилислериндеги шығып сөйлеген сөзлеринде де усы тәрепке итибар қаратты. Соның ишинде, мәмлекетимиз басшысы соңғы бес жылда "Коррупцияның жоқлығы" көрсеткишинде Өзбекстан 23 басқышқа жоқарыға көтерилип, 2023-жылы 140 мәмлекет арасында 66-орынды ийелегени ҳәм Орайлық Азия регионында бул бағдарда сезилерли унамлы көрсеткишти көрсеткенин атап өтти.
Мәмлекетлик уйымлар ҳәм шөлкемлер жумысының ашық-айдынлығын баҳалаў бойынша "ашық-айдынлық индекси" енгизилди. Баҳалаў нәтийжелерине бола, қанаатландырарсыз деп табылған мәмлекетлик шөлкемлердиң басшыларының есабаты миллий кеңес мәжилислеринде тыңланбақта. Бирақ бул бағдарда еле шешимин күтип атырған мәселелер де жетерли. Өткен жылы коррупцияға байланыслы жынаятлар 12 процентке азайған болса да, 6500 шахс коррупцияда айыпланып, жуўапкершиликке тартылған.
Мәмлекетимиз басшысының атап өткениндей, коррупция жағдайы соңғы жыллары сезилерли дәрежеде азайған, бирақ мақсетимиз оны пүткиллей жоқ етиў. Себеби, бул иллет уллы мақсетлерге ерисиўимиз, потенциаллы жаслардың өзин көрсетиўинде шырмаўық сыяқлы тосқынлық етеди. Системаларды коррупциядан пүткиллей азат етсек, бул да Үшинши Ренессансқа ерисиў жолындағы үлкен жеңис болады, деп ойлайман.
Президентимиз билимлендириў мәселесине де айрықша итибар қаратты. Себеби, оныңсыз Үшинши Ренессансты көз алдымызға келтире алмаймыз. Соның ушын, мәмлекетимиз басшысы бәрқулла билимлендириўге раўажланыў драйвери сыпатында итибар қаратып келеди. Бул итибардан үлкен нәтийжелер күтилмекте. Соның ишинде, келеси жылларда бақшаларға қамтыўды 80 процентке, жоқары оқыў орынларында болса кеминде 50 процентке жеткериў ҳүкимет ушын тийкарғы ўазыйпа болып қалады. Халықаралық финанс институтларының 61 миллион доллар қаржысы есабынан 2025-жылы 252 жаңа бақша қурылады. Сондай-ақ, 174 бақша ҳәм 379 мектеп оңланады ҳәм жаңадан қурылады. Бул мақсетлер ушын бюджеттен 4 триллион сум ажыратылады. Исбилерменлерге мектеп қурыў ушын 20 миллиард сумға шекем жеңиллетилген кредит бериледи. Онда кредит ставкасының 13,5 проценттен артқан бөлеги бюджеттен қаплап бериледи. Әлбетте, бул ўазыйпалардың орынланыўы жедел раўажланып атырған билимлендириў системамыз ушын үлкен раўажланыў болады.
Жаслар - келешек дөретиўшиси. Мәмлекетимиздеги жасларға байланыслы мәмлекетлик сиясаттың тийкарында әне усы исеним жатады, деп ойлайман. Жасларымыз бизден де билимли, потенциаллы болып камалға келиўи керек. Себеби дәўир талабы сондай. Олар жарқын келешекке күшли күш-ғайрат пенен қарайтуғын, руўхый күшли болыўы керек. Бул руўхый мәртликти ҳәм өзин-өзи қәлиплестириў болса бизиң бүгинги ўазыйпамыз. Президентимиз жасларымыз санасында миллий мақтаныш пенен бирге улыўмаинсаныйлық қәдириятларға ҳүрмет сезимин жетилистириў мақсетинде жасларға байланыслы мәмлекетлик сиясатты жетилистириў зәрүрлигин атап өтти.
Бул ўазыйпалар бәршемизге бирдей тийисли болыўы керек. Себеби жетик әўладты камалға келтириў пүткил жәмийеттиң иси. Буның ушын болса өзимиз де руўхыйлығымызды раўажландырыўды тынымсыз даўам етиўимиз керек. Себеби, тәрбияда өрнек болыў оғада әҳмийетли.
Фируза ИКРОМХОНОВА,
Ташкент мәмлекетлик педагогика университети проректоры,
филология илимлериниң докторы, профессор
