Кеңес Сенаттың сегизинши жалпы мәжилисин 2025-жыл 25-июньда шақырыў ҳаққында қарар қабыл етти.
Видеоконференцбайланыс системасынан пайдаланған ҳалда өткерилетуғын жалпы мәжилистиң күн тәртибине жәмийетлик, сиясат, экономика, нызамшылық, халықаралық бирге ислесиў ҳәм инсан ҳуқықлары тараўларына байланыслы бир қатар әҳмийетли нызамлар және парламентлик қадағалаў шеңбериндеги мәселелер киргизилген.
Соның ишинде, парламент ағзалары тәрепинен әмелге асырылып атырған реформалардың нәтийжелилиги, аймақларда жумыслардың барысы, халықты ойландырып атырған мәселелерге шешим табыў бойынша Өзбекстан Республикасы Президенти Ш.М.Мирзиёев тәрепинен белгилеп берилген тийкарғы бағдарлардан келип шығып, Олий Мажлис Сенаты ҳәм халық депутатлары жергиликли Кеңеслери алдында турған биринши дәрежели ўазыйпалар додаланады.
Буннан тысқары, парламентте сиясий ҳәр түрлиликти тәмийинлеў, ашық-айдынлық ҳәм пикирлесиў орталығын раўажландырыў мақсетинде оппозицияның кепилленген ҳуқықларын кеңейтиўге қаратылған нызам көрип шығылады.
Сенаторлар тәрепинен суд ҳүжжетлери ҳәм басқа да уйымлардың ҳүжжетлерин орынлаўда кепиллик қаржыларын енгизиў бойынша нызамға усыныс етилип атырған өзгерислер де додаланады.
Сондай-ақ, мәжилисте экономикалық, аграр, экологиялық ҳәм инвестиция тараўларына байланыслы айырым нызам ҳүжжетлерине қосымшалар ҳәм өзгерислер киргизиў ҳаққындағы нызамлар көрип шығылады.
Халықаралық бирге ислесиўге байланыслы мәселелер шеңберинде Түркий мәмлекетлер шөлкеминиң Пуқаралық қорғаў механизмин шөлкемлестириў ҳаққындағы Келисимди ратификациялаў, сондай-ақ, Ядролық зыян ушын пуқаралық жуўапкершилик ҳаққындағы Вена конвенциясына Өзбекстан Республикасының қосылыўы ҳаққындағы нызамларды додалаў режелестирилген.
Соның менен бирге, сенаторлар тәрепинен Өзбекстан Республикасы Орайлық банкиниң 2024-жылдағы жумысы ҳаққындағы есабаты тыңланады.
Жалпы мәжилисте инвестициялық орталықты жақсылаў, мийнет нызамшылығына әмел етилиўин тәмийинлеў ҳәм ержетпеген балалардың тәмийнаты ушын алимент өндириў ҳәм төлеў системасын жетилистириў бойынша тийисли министрликлер ҳәм уйымларға парламентлик сораўлар жибериў мәселелери де көрип шығылады, деп хабар бермекте Олий Мажлис Сенатының баспасөз хызмети.
