Мәжилисти Инвестициялар, санаат ҳәм саўда министриниң орынбасары Шоҳрух Ғуломов ҳәм Германия экономикалық бирге ислесиў ҳәм раўажланыў федерал министрлиги (BMZ) ўәкили Каролина Пробст басқарып барды.
Ушырасыўда тәреплер шерикликтиң бүгинги жағдайы ҳәм перспективаларын додалап, Өзбекстан - Германия қатнасықларының стратегиялық характерин тастыйықлады. Атап өтилгениндей, KfW раўажланыў банки менен биргеликтеги жойбарлардың улыўма портфели улыўма баҳасы 3,8 миллиард евро болған 33 жойбарды өз ишине алады, соннан 280 миллион евро грант қаржылары болып есапланады. Буннан тысқары, Германия халықаралық бирге ислесиў жәмийети (GIZ) менен бирге ислесиў мәмлекетлик басқарыў, билимлендириў ҳәм климат турақлылығы тараўларындағы реформаларға хызмет етпекте.
Жойбарларды келисиў ҳәм әмелге асырыў тәртип-қағыйдаларының нәтийжелилигин арттырыў мәселелерине айрықша итибар қаратылды. Өзбекстан тәрепи Германияның айырым ҳәкимшилик тәртип-қағыйдаларды әпиўайыластырыў бойынша басламасын унамлы баҳалады, бул жаңа бағдарламаларды енгизиўди жеделлестириў имканиятын береди.
Мәсләҳәтлесиўлерде келешектеги бирге ислесиўдиң тийкарғы бағдарлары - турақлы раўажланыў, профессионал билимлендириў, денсаўлықты сақлаў, социаллық қорғаў ҳәм "жасыл" энергетика тастыйықланды.
Ушырасыў жуўмағында тәреплер 2026-жылы өткерилиўи режелестирилген гезектеги ҳүкиметлик сөйлесиўлерге таярлықты баслаўға келисип алды, мәсләҳәтлесиўлер Өзбекстан-Германия шериклигин және де беккемлеўде әҳмийетли қәдем болғанын атап өтти.
