«Danish Travel Show» Скандинавия (Арқа Европа) регионының ең ири туристлик илажы болып, Арқа Европа мәмлекетлериниң туризм базары ўәкиллери, жетекши туроператорлар, авиакомпаниялар, мийманхана тармақлары ҳәм туризм тараўында хызмет көрсететуғын компанияларды бир платформаға бирлестиреди. Ярмарка 60 тан аслам мәмлекет ўәкиллери, сондай-ақ, мыңлаған профессионал ҳәм саяхатшыларды қамтып алған В2В ҳәм В2С форматындағы абырайлы халықаралық майдан болып есапланады.
Өзбекстан миллий стендинде елимиздиң бай тарийхый-мәдений мийрасы, зыярат туризми бағдарлары, гастрономиялық бағдарлар, экологиялық ҳәм таў туризм потенциалы кеңнен көрсетилди. Атап айтқанда, Самарқанд, Бухара, Хийўа ҳәм Ташкент қалаларының туризм имканиятлары, жаңа маршрутлар ҳәм заманагөй инфраструктуралардың презентациясы өткерилди.
Ярмарка шеңберинде сырт елли бирге ислесиўшилер менен В2В форматында ушырасыўлар өткерилип, онда Скандинавия мәмлекетлеринен Өзбекстанға туристлер ағымын көбейтиў, биргеликтеги турпакетлерди ислеп шығыў ҳәм маркетинг тараўындағы бирге ислесиўди кеңейтиў мәселелери додаланды. Сондай-ақ, Өзбекстанның ашық ҳәм қәўипсиз туристлик бағдар сыпатындағы статусы, визасыз тәртип ҳәм әпиўайыластырылған виза тәртиплери ҳаққында толық мағлыўмат берилди.
«Danish Travel Show»да қатнасыў Арқа Европа базарына шығыў, жаңа шериклер табыў ҳәм Өзбекстанның туризм брендин алға қойыўда әҳмийетли қәдем болды. Бул халықаралық көргизбе мәмлекетимиздиң Европа туристлик картасындағы орнын беккемлеў, туристлер географиясын диверсификациялаў ҳәм миллий туризмниң экспорт потенциалын арттырыўға хызмет етеди.
