2026-2027-жылларда республикада ыссыханалар жумысының тийкарғы мақсетли көрсеткишлери:
Сурхандәрья ўәлаятының Шерабад районында кеминде 940 гектар майданда заманагөй ыссыхана комплекслерин жайластырыў;
энергияны үнемлейтуғын ҳәм альтернатив энергия дәреклерине тийкарланған ысытыў системаларының үлесин кеминде 50 процентке жеткериў;
атмосфера ҳаўасына зыянлы шығындыларды шығаратуғын исбилерменлик субъектлериниң жумысын басқышпа-басқыш қысқартыў.
Сурхандәрья ўәлаяты Шерабад районында мәмлекетлик шөлкем түриндеги "Сурхон-Агро" дирекциясы менен "Сурхон-Агро" еркин экономикалық зонасы шөлкемлестириледи.
"Сурхон-Агро" зонасының жумыс ислеў мүддети 30 жылды қурайды, кейин ала оның мүддети создырылыўы мүмкин. Оның қатнасыўшыларына ЕЭЗ қатнасыўшылары ушын белгиленген айырым салық, бажыхана жеңилликлери ҳәм басқа да преференциялар қолланылады.
Ыссыханаларды қоллап-қуўатлаў илажлары
"Сурхон-Агро" зонасы аймағында жумыс алып барып атырған ыссыхана хожалықларына төмендеги жеңилликлер ҳәм преференциялар бериледи:
исбилерменлерге жер участкаларын электрон онлайн-аукцион арқалы ижараға бериўде 5 жыл даўамында ижара төлеминиң ноллик ставкасы қолланылады;
ийелери ыссыханаларды суўғарыў ҳәм технологиялық процесслер ушын пайдаланылатуғын ақаба ҳәм жер асты суўлары ушын төлемлерден 3 жыл мүддетке азат етиледи;
аномал суўық ҳаўа райы дәўиринде, айрықша тәризде, белгиленген экологиялық талапларға әмел еткен ҳалда көмирди жағыўға рухсат бериледи.
Сондай-ақ, 2026-жыл 1-июньнен 2028-жыл 1-июньге шекем "Сурхон-Агро" зонасы қатнасыўшылары арасында ислеп шығарылған өнимлерди кооперация тийкарында кепилликли сатыў ҳәм инженерлик инфраструктурасына жалғаныў бийпул әмелге асырылады.
Ҳүжжет Нызамшылық мағлыўматлары миллий базасында жәрияланған ҳәм 28.03.2026-жылдан күшке кирди, деп жазады «Norma».
