Социаллық қорғаў миллий агентлиги баспасөз хызметиниң хабар бериўинше, 0-17 жас аралығындағы 8 мыңнан аслам жетим ҳәм ата-ана қарамағынан айырылған балаларға атамаластырылған депозит есап бетлери ашылған. Бундай есапбетлердиң ҳәр бирине мәмлекет тәрепинен 500 АҚШ доллары муғдарында қаржы қойылды. Бул қаржылар жыйналып барады ҳәм капиталластырыў есабынан жыллар өткен сайын көбейип барады. Бала 18 жасқа толғанда олардан үлкен өмирде биринши еркин қәдем таслаўы ушын пайдаланыўы мүмкин болады.
Соның менен бирге, 9 жастан баслап балалар ҳәм олардың нызамлы ўәкиллерине социаллық карталар берилди. Бул қолайлық, қәўипсизлик ҳәм ашық-айдынлық ушын исленген. Социаллық карта ҳәзирги күнниң өзинде жеңиллетилген жәмийетлик транспорттан пайдаланыў, сатып алыў ҳәм хызметлер ушын ҳақы төлеў, шахсын ҳәм социаллық жәрдем және хызметлер алыў ҳуқықын тастыйықлаў имканиятын бермекте. Барлық операциялар "Барака" мобил қосымшасында көрсетиледи ҳәм қаржылардың жумсалыўын қадағалаў имканиятын береди.
Бул қоллап-қуўатлаў мәмлекет ғамхорлығына айрықша мүтәж болған балаларға қаратылған:
мәҳәллелерде жасайтуғын жетим балалар ҳәм ата-анасының қарамағынан айырылған балаларға;
балалар үйлери, шаңарақлық ҳәм киши балалар үйлери, сондай-ақ, SOS балалар аўылларының тәрбияланыўшыларына;
ата-анасы Ўатан шегараларын қорғаўда қайтыс болған балаларға;
"Таскин" хосписи жанындағы балалар онкология емлеўханасында емленип атырған балаларға.
"Таскин" балалар хосписинде емленип атырған балалар ушын айрықша тәртип нәзерде тутылған: депозит есабындағы қаржылар нызамлы ўәкиллериниң мүрәжаты бойынша банк картасына қәлеген ўақытта өткерилиўи мүмкин.
Бул ҳәр бир балаға ғамхорлық, исеним белгиси. Бул "Сен жалғыз емессең, сени еске алады, сениң келешегиң бар" деген басланыў.
