Ҳүкимет қарары (255-сан, 23.04.2025 ж.) менен "Республикада жаңа бағларды жаратыўды Өзбекстан Республикасы Аўыл хожалығы министрлиги жанындағы Агросанаатты раўажландырыў агентлиги жанындағы Агросанаатты раўажландырыў ҳәм қоллап-қуўатлаў мәмлекетлик мақсетли қоры кредит ресурслары есабынан коммерциялық банклер арқалы қаржыландырыў ҳаққында"ғы реже тастыйықланды.

Режеге бола, жойбарларды әмелге асырыўшы исбилерменлерге коммерциялық банк тәрепинен кредит қаржылары Орайлық банктиң тийкарғы ставкасынан 4 процентлик пункт жоқары ставкада миллий валютада 3 жыллық жеңиллетилген дәўир менен 7 жыл мүддетке ажыратылады.

Кредит қаржылары кредит алыўшыға төмендеги муғдарларда ажыратылады:

• 1-басқышта - жер майданын егиске таярлаў ушын жеңиллетилген кредиттиң 10 процентине шекем;
• 2-басқышта - нәл сатып алыў ҳәм егиў қәрежетлерине жеңиллетилген кредиттиң 40 процентине шекем;
• 3-басқышта - суўғарыў системаларын орнатыў қәрежетлерине жеңиллетилген кредиттиң 30 процентине шекем;
• 4-басқышта - бағ зүрәәтке киргенге шекем 3 жыл тәрбиялаў қәрежетлерине жеңиллетилген кредиттиң 20 проценти.

Онда жаңа бағ ҳәм жүзим атызларын жаратыў және мийўе ҳәм жүзим өнимлерин заманагөй сайлап алыў, қадақлаў ҳәм қайта ислеўди шөлкемлестириў бойынша жойбардың техникалық-экономикалық тийкарында нәзерде тутылған жер майданына сәйкес түрде, бирақ 1 гектарға БЕМниң 500 есесинен көп болмаған муғдарда жеңиллетилген кредитлер ажыратылады.