Қарарға бола, 2030-жылға шекем Жаслар ислери агентлигиниң 20
мың жасты исбилерменликке оқытыўға қаратылған "Жаңа әўлад
исбилерменлери" бағдарламасы иске қосылады ҳәм оған муўапық:
жергиликли ҳәм сырт елли экспертлер (консултантлар),
сондай-ақ, жеке меншик сектор менен шәртнама тийкарында бирге ислесиў
шөлкемлестириледи, "Жаңа әўлад исбилерменлери" бағдарламасы
шеңберинде оқыў ушын жаслар таңлап алынады;
бағдарлама шеңберинде бизнес жойбарын ислеп шығыў, сатыўға шығыў
ҳәм базарды кеңейтиў сыяқлы бағдарларды қамтып алған исбилерменлик тийкарлары
бойынша билим бериледи;
жойбар нәтийжелери бойынша жаслардың билими сынақтан
өткерилип, унамлы өзлестириў көрсеткишлерине ерискен ең жақсы 1 мың жасқа
Жаслар ислери агентлигиниң сертификаты бериледи;
сертификаты бар жасларға 3 жылға шекем 6 айлық жеңиллетилген
дәўир менен Орайлық банктиң тийкарғы ставкасының 50 проценти муғдарындағы
процент ставкасында БЕМның 500 есесине шекемги муғдарда кредит ажыратылады.
2026-жыл 1-августтан баслап районлық фермерлер кеңеслери
жанындағы Фермер хожалықларында бухгалтерия есабы ҳәм есабатын жүргизиў
орайлары 2 жыл даўамында жаңадан шөлкемлестирилип атырған, басшылары жаслар
болған фермер хожалықларына ағзалық төлемин төлеўден, пахта ҳәм ғәлле
жетистириўден бийғәрез бийпул хызмет көрсетеди.
2026-жыл 1-июльден баслап жаслар тәрепинен шөлкемлестирилген
исбилерменлерди инженерлик-коммуникация тармақларына (электр энергиясы, ишимлик
суўы ҳәм канализация тармағы) жалғаў менен байланыслы мәмлекетлик хызметлер
ушын қәрежетлердиң БЕМниң 10 есесинен көп болмаған бөлеги қаплап бериледи.
