ӨР Президентінің 2017 жылғы 3 мамырдағы жарлығына сәйкес елдің 7 аймағында фармацевтикаға маманданған еркін экономикалық аймақтар құрылған болатын. Сол жылдың 7 қарашасындағы қаулыға сәйкес Денсаулық сақтау министрлігі жанынан Фармацевтикалық өнеркәсіпті дамыту агенттігі құрылды. Дәрілік өсімдіктерді өсіру, оларды өңдеу, инвестиция тарту және бәсекеге қабілетті өнім өндіру үшін кең жағдайлар жасалды.
Соның нәтижесінде, соңғы 5 жылда 71 жаңа кәсіпорын ашылып, 2500 -ден астам түрдегі дәрі-дәрмек, 241 медициналық мақсаттағы бұйымдар мен 78 медициналық құрал-жабдықтар өндірісі іске қосылды. Фармацевтикалық өнім көлемі екі есеге жуық өсті.
Бірақ бұл нәтижелер әлі де жеткіліксіз. Бүгінде жергілікті кәсіпорындар ішкі нарықтың сұранысын заттай түрде бар-жоғы 55% ғана қанағаттандыруда.
Алдағы 5 жылда бұл саладағы өндірісті 3 есеге ұлғайтып, ішкі нарыққа ұсыныс деңгейін табиғи түрде 80% -ға дейін жеткізуді көздеп отыр. Осы мақсатта 2022-2026 жылдарға арналған перспективалы жобалар әзірленді.
Атап айтқанда, бүгінгі презентацияда жалпы құны 1,25 млрд доллар болатын 104 инвестициялық жобаның жоспары таныстырылды. Нәтижесінде 376 миллион долларлық импорттың орнын басатын өнім шығарылады және жоспар бойынша 84 миллион долларлық экспорттық қуат пайда болмақ. Ең бастысы, 9 мыңға жуық адам жұмыспен қамтылады.
Мемлекет басшысы осы жобалардың әлеуметтік-экономикалық маңыздылығына тоқтала отырып, оларды жеделдетуді тапсырды.
Бүгінгі презентация аясында жергілікті емдік өсімдіктерді өсіру мен өңдеуге де назар аударылды.
Республика аумағында дәрілік өсімдіктердің 750 түрі өседі. Қазірде оларды пайдалануға және әлемдік нарықта сұранысқа ие табиғи өнім өндіруге барлық жағдай жасалған. Атап айтқанда, ӨР Президентінің 2020 жылғы 10 сәуірдегі Жарлығымен жабайы дәрілік өсімдіктерді қорғау, өсіру және өңдеу бойынша қосымша шаралар белгіленді, жекелеген аудандар дәрілік өсімдіктерді өсіруге мамандандырылды. Осы бағытта 19 кәсіпорын іске қосылды.
Бірақ дәрілік өсімдіктердің 750 түрінің тек 70 түрін жергілікті кәсіпорындар қолдануда.
Президент республикадағы дәрілік өсімдіктерді терең өңдеу арқылы экспортты 15 млн долларға жеткізіп, 5 мыңнан астам адамды жұмыспен қамтамасыз етуге мүмкіндік бар екенін атап өтті. Соның негізінде шенеуніктерге осы салада кластерлер құру арқылы өндірісті кеңейтуді тапсырды.
Саладағы тағы бір ірі жоба - бұл «Tashkent Pharma Park» инновациялық ғылыми-өндірістік фармацевтикалық кластері. Мемлекет басшысының 2020 жылғы 28 қаңтардағы жарлығына сәйкес құрылған бұл заманауи орталық Ташкент облысының Зәңгіата ауданында салынып жатыр. Онда фармацевтикалық университет, фармакопея орталығы, ғылыми орталық, сараптамалық орталық, зертханалар, вивариум және ғылыми-тәжірибелік өндірістік ғимарат салынуда.
Сондай -ақ, құны 140 млн долларды құрайтын 7 инвестициялық жобаны жүзеге асыру жоспарлануда.
