Кездесуде Өзбекстан мен Қытай арасындағы жан-жақты стратегиялық серіктестік қатынастарын одан әрі нығайту және көпжақты ынтымақтастықты кеңейтудің өзекті мәселелері талқыланды.
Өңірлік ынтымақтастықты нығайту перспективалары, соның ішінде Шанхай ынтымақтастық ұйымының алдағы Самарқанд саммитінің күн тәртібі туралы пікір алмасылды.
Кездесу басында Қытай Сыртқы істер министрі Мемлекет басшысына ҚХР Төрағасы Си Цзиньпиннің сәлемі мен ізгі тілегін жеткізді. Қытай тарапы жоғары қарқынмен дамып келе жатқан екіжақты қарым-қатынастардың қазіргі деңгейін жоғары бағалайтыны атап өтілді. Жаңа Өзбекстанда жүзеге асырылып жатқан саяси реформалар мен әлеуметтік-экономикалық реформалар толық қолдау тауып отырғаны айтылды.
Айта кету керек, Қытай дәстүрлі түрде еліміздің жетекші және сенімді серіктестерінің бірі болып табылады. Сауда-экономикалық және инвестициялық ынтымақтастық қарқынды дамып келеді. Биылғы жылдың басынан бері өзара сауда көлемі 35 пайызға артты. Жыл соңына дейін тауар айналымы 10 миллиард долларға жетеді деп күтілуде.
Қытайлық компаниялар мен банк мекемелерінің қатысуымен өнеркәсіптік кооперация және инфрақұрылымды жаңғырту бойынша бірқатар ірі инвестициялық жобалар жүзеге асырылуда. Соңғы жылдары Өзбекстан экономикасына бағытталған инвестиция көлемі 10 миллиард доллардан асты.
Мемлекет басшысы өзара тиімді ынтымақтастықты ең алдымен, кедейшілікпен күрес, ауыл шаруашылығы және өнеркәсіп өнімдерін экспорттау, инновацияларды енгізу, баламалы энергия, «бұлттық» технологиялар, IT және басқа да салаларда түбегейлі кеңейту мүмкіндіктері бар екенін атап өтті.
Гуманитарлық алмасу бағдарламаларын, оның ішінде білім беру мен денсаулық сақтауды, вакциналарды өндіруді және мамандандырылған медициналық мекемелерді құруды ілгерілетуге айтарлықтай көңіл бөлінді.
Стратегиялық өңірлік жобаларды, бірінші кезекте «Қытай-Қырғызстан-Өзбекстан» және «Термез-Мазари-Шариф-Кабул-Пешовар» теміржол жобаларын дайындау және іске асыруды жеделдету мәселелері бөлек қаралды.
Кездесуде Ауғанстанның бейбіт дамуы мен экономикасын қалпына келтіруге практикалық көмек көрсету бойынша өзара күш-жігер қолдау тапты. Қытай делегациясы осы мәселелерге арналған Ташкент конференциясының жемісті нәтижелерін жоғары бағалады.
