Өзбекстанда әуежайларды жаңғырту бойынша үлкен жұмыстар жүргізілуде. Биылдың өзінде Шахрисабз, Қоқан және Зомин әуежайлары іске қосылып, Наманган мен Әндіжанда жаңғырту жұмыстары басталды.
Әуежайларды басқаруға жеке сектордың тартылуы да өз нәтижесін беруде. Атап айтқанда, Самарқанд халықаралық әуежайы жеке басқаруға беріліп, жаңғыртудан кейін рейстер мен жолаушылар саны 5 есеге артты.
Осындай әлеует Бұхарада да бар. Алайда ондағы әуежай халық пен туристердің сұранысын қанағаттандырмай отыр. Бұл әуежай сағатына 400 адамға немесе жылына 1 миллион жолаушыға қызмет көрсете алады, бірақ бұл қажеттілікке сай келмейді.
Ұшу басқару және жолаушыларға қызмет көрсету жүйелері, күту және шығарып салу залдары ескіргендіктен, рейстердің санын арттыру мүмкіндігі шектеліп тұр. Көптеген туристер Бұхараға жету үшін Ташкент, Самарқанд немесе Үргеніш әуежайларына қонуға мәжбүр. Мысалы, 9 айда Бұхараға келген 1 миллионнан астам шетелдік туристің 95 пайызы пойыз немесе көлікпен барған.
Облыста қонақ үйлер желісі мен зиярат туризмі қарқынды дамып келеді. Алдағы үш жылда Бұхараға туристік ағымды 8 миллионға жеткізу жоспарланған.
Осыған байланысты биыл 31 мамырда Президенттің облысқа сапары барысында Бұхара ауданында жаңа халықаралық әуежайдың құрылысы басталған еді. Мемлекеттік-жекеменшік әріптестік негізіндегі осы жоба аясында әлемдік стандарттарға сай әуежай салынады. Сағатына 1200 жолаушыға қызмет көрсету мүмкіндігі жасалады. Жолаушыларға және әуе кемелеріне қызмет көрсету сапасын арттыру арқылы жаңа халықаралық әуе компаниялары тартылады.
Таныстырылымда жобаның техникалық-экономикалық аспектілері туралы ақпарат берілді.
Мемлекет басшысы жаңа әуежайдың өткізу қабілетін 2 есе арттырып, сағатына 8 ұшақтың қонуы мен ұшып кетуін қамтамасыз ету қажеттігін атап өтті. Терминалдың қолайлылығы, ішкі және сыртқы көрінісі бойынша ұсыныстар берілді.
