Құрылыс жұмыстарын үйлестіру жөніндегі кеңес пен дирекция құрылып, жоспарлау жұмыстары жүргізілді.

2024 жыл 3 сәуір күні қасиетті Рамазан айында мұнда алғашқы нысандардың құрылысын бастау рәсімі өтті.

Шарада сөз сөйлеген Президент Шавкат Мирзиёев бұл тарихи оқиға екенін атап өтті.

– Бүгін біз «Жаңа Өзбекстан» университеті мен Ташкент мемлекеттік педагогикалық университетінің кампустары, Ұлттық кітапхана, Ұлттық театр, Әлішер Науаи атындағы халықаралық ғылыми-зерттеу орталығы, Әдебиет мұражайы, Шығармашылық мектебі және Ұлттық мақом орталығының ірге тасын қалаймыз. Жаңа қаланың құрылысы ғылым мен руханият орындарынан бастау алуы бекер емес. Бұл біздің ағартылған қоғам құру идеясының негізі мен үлгісі болады, – деді Мемлекет басшысы.

Ағартушы қоғамның басты іргетасы – мектеп болса, ұстаз – тірегі. Сондықтан мұнда алғашқылардың қатарында Ташкент мемлекеттік педагогикалық университетінің жаңа кампусы салынады. Оның құрамында 20 мың орындық оқу корпустары, 5 мың орындық жатақхана, 300 орындық балабақша, 616 орындық мектеп, 588 орындық академиялық лицей, заманауи спорт кешені, мәдениет сарайы, амфитеатр және басқа да нысандар бар. Жоғары рейтингті шетелдік университеттердің тәжірибесі негізінде «балабақша – мектеп – университет» инновациялық педагогикалық кластері құрылады.

«Жаңа Өзбекстан» университеті – инженерия, менеджмент, ақпараттық технологиялар, агротехнологиялар, гуманитарлық және жаратылыстану ғылымдары бойынша мамандар даярлайтын республикадағы ең беделді университеті.

Бұл университетке қалада заманауи кампус та салынады. Атап айтқанда, мұнда 10 мың студентке арналған оқу ғимараттары, 1150 орындық асхана, кітапхана мен ықшам мұражай, спорт кешені, олимпиадалық жүзу бассейні салынады. Сондай-ақ студенттерге арналған 2 мың орындық, профессорлар үшін 286 орындық жатақхана салынады.

Келесі жоба – Өзбекстан Ұлттық кітапханасы үшін жаңа кешен. Мұнда кітапхана қорында сақталған 10 миллионнан астам кітаптың дұрыс сақталуына және бір мезгілде 1420 оқырманға сапалы қызмет көрсетуге барлық жағдай жасалған. Оның жалпы ауданы 30 мың шаршы метрді құрайды.

Театр өнері ұлттық руханиятпен, жастар тәрбиесімен тығыз байланысты. Сондықтан Жаңа Ташкентте халықаралық талаптарға сай ұлттық театрдың керемет ғимараты бой көтермек. Онда әртістерге де, көрермендерге де қолайлы жағдай жасалады. Ол болашақта республикадағы барлық театрлар үшін бірегей шығармашылық зертхана қызметін атқаратын болады.

Сондай-ақ қалада Әлішер Науаи атындағы халықаралық ғылыми-зерттеу орталығы, шығармашылық мектеп, Әдебиет мұражайы және Ұлттық мақом орталығын қамтитын бірегей рухани кешен бой көтермек.

Мемлекет басшысы бұл кешендердің мүмкіндіктері мен маңыздылығына тоқталды.

– Бүгінде іргетасы қаланып жатқан халқымыздың руханиятын ұзақ жылдар бойы байытып, жастарымызды жан-жақты жетілген тұлға етіп тәрбиелеуге қызмет етеді. Жаңа Ташкент еліміздің ғана емес, аймақтағы нағыз ғылым мен мәдениет орталығына айналуына үлкен үлес қосады деп ойлаймын, – деді Шавкат Мирзиёев.

Президент рәміздік түймені басып, ғимараттардың құрылысын бастап берді.