Аз соли 2017 ба иқтисодиёти Ӯзбекистон аз тамоми сарчашмаҳо 188 миллиард доллар сармоягузорӣ ҷалб карда шуд, ки аз ин 87 миллиардро сармоягузориҳои хориҷӣ ташкил медиҳанд. Ин имкон дод, ки ҳиссаи сармоягузорӣ дар ММД (маҳсулоти миллии дохилӣ) зиёда аз 30 фоиз зиёд шавад, ки асоси рушди устувори иқтисодӣ гардид.
Дар соли 2024 ҳаҷми сармоягузорӣ ба иқтисодиёт 1,3 баробар афзуда, аз 36 миллиард доллар гузашт. Ба шарофати ин, аз аввали сол 560 лоиҳаи бузург ва миёна бо арзиши умумии 70 триллион сӯм ба истифода дода шуд. Инчунин, барои афзоиши содирот ба 1 миллиард доллар дар соли оянда замина фароҳам оварда шуд.
Ин натиҷаҳоро бо истифода аз имкониятҳои нав дар соҳаҳо ва минтақаҳои гуногун метавон тақвият дод.
Дар ҷамъомад вазири сармоягузорӣ, саноат ва савдо нақшаҳои соли 2025-ро пешниҳод кард.
Соли оянда ба нақша гирифта шудааст, ки сармоягузорӣ ба маблағи 43 миллиард доллар азхуд карда шавад. Ин имкон медиҳад, ки зиёда аз 300 лоиҳаи бузург амалӣ карда, истеҳсоли 662 навъ маҳсулоти нав, ки бо воридот рақобатпазир мебошанд, оғоз гардад.
Роҳбари давлат зарурати пеш бурдани кори мақсаднокро бо сармоягузорони хориҷӣ, тавсеаи шароит барои онҳо ва татбиқи босифати тамоми созишномаҳои бадастомадаро таъкид намуд.
Дар айни замон, кор дар доираи 1 890 лоиҳа идома дорад. Роҳбарони масъул барои суръат бахшидан ба онҳо муайян шудаанд.
Дар ҷамъомад ба масъалаҳои савдои хориҷӣ таваҷҷуҳи махсус зоҳир гардид.
Дар шароити вазъи мураккаби байналмилалӣ муваффақият дар ин соҳа кӯшишҳои махсусро талаб мекунад. Занҷирҳои содиротиву логистикӣ мураккаб шуда истодаанд ва талабот ба маҳсулоти тайёр дар бозорҳои калидии содиротӣ коҳиш меёбад.
Дар чунин шароит сафарбаркунии пурраи захираҳои дохилӣ барои суръат бахшидан ба рушди иқтисодӣ зарур аст, таъкид карда шуд дар ҷаласа. Ҳадаф то соли 2030 — ду баробар зиёд кардани ҳаҷми солонаи содирот ва ба 45 миллиард доллар расондани он мебошад.
Барои ин муҳим аст, ки лоиҳаҳои сармоягузорӣ сари вақт ба кор оғоз кунанд, истеҳсоли маҳсулот ва хидматрасониҳо бо арзиши баланди иловагӣ зиёд шавад ва бозорҳои содиротӣ васеъ гарданд.
Ба шахсони масъул супориш дода шуд, ки иҷрои нақшаҳои муайяншударо пайваста назорат кунанд ва ташкили босифати корҳоро дар маҳалҳо таъмин намоянд.
