Соҳаи фармасевтӣ, ки аҳамияти муҳими иқтисодӣ ва иҷтимоӣ дорад, аз ҷониби давлат ба таври васеъ дастгирӣ меёбад. Дар ҳафт соли охир ҳаҷми истеҳсоли маҳсулоти фармасевтӣ ду маротиба афзоиш ёфт, содирот 11 баробар, шумораи корхонаҳо се маротиба афзуд ва 750 миллион доллар сармоя ҷалб карда шуд.
Имрӯз дар кишвар 3,5 ҳазор номгӯйи доруворӣ ва маҳсулоти тиббӣ истеҳсол мешавад. Аммо ин барои пурра қонеъ кардани талабот кофӣ нест.
Дар робита ба ин, роҳбари давлат ташаббусҳои муҳимро оид ба маҳалликунонии истеҳсолот ва густариши содирот пешниҳод кард.
«Асакабонк» ва Агентии рушди соҳаи фармасевтӣ дар ҳамкорӣ бо корхонаҳои калон барномаи то соли 2025-ро таҳия мекунанд, ки барои азхудкунӣ ва истеҳсоли 200 намуди доруҳои серталаб равона шудааст. Ин имкон медиҳад, ки ҳаҷми истеҳсолот ду маротиба зиёд шавад. Барои татбиқи чунин лоиҳаҳо 400 миллион доллар, ки бо шароити имтиёзнок ҷалб мешаванд, равона карда мешавад.
Фонди сармоягузории лоиҳаҳои пешрафтаи фармасевтӣ таъсис дода мешавад, ки ҳамчун иштирокчии саҳмиядор ва катализатор барои лоиҳаҳо дар самтҳое чун биофармасевтика, технологияҳои ҳуҷайравӣ ва онкология хоҳад буд.
Фонди таҷдид ва рушди кишвар ба «Асакабонк» хати қарзӣ ба маблағи 100 миллион доллар барои лоиҳаҳо дар ин соҳа боз мекунад. Ин маблағҳо барои хизматрасониҳои лизингӣ низ ҷудо карда мешаванд.
Инчунин, «Асакабонк» ширкати венчурӣ бо сармояи 10 миллион доллар барои маблағгузории стартапҳо ва тиҷоратикунонии коркардҳои нав таъсис медиҳад. Ба ширкат маблағҳои иловагӣ бе экспертиза ба андозаи баробар ба миқдори сармояи мустақилона ҷалбшуда ҷудо карда мешаванд.
Муайян карда шуд, ки барои дастгирии коркардҳои нав аз Фонди инноватсионӣ 20 миллиард сӯм дар шакли грант ҷудо мешавад. Ин маблағҳо барои табдил додани коркардҳои нави дорувории миллӣ ба лоиҳаҳои тиҷоратӣ ва дастгирии стартапҳо равона карда мешаванд.
Муҳлати эътибори имтиёзҳои гумрукӣ барои корхонаҳои фармасевтии маҳаллӣ, ки 1 январи соли 2025 ба анҷом мерасад, боз се сол дароз карда мешавад.
Корхонаҳои ватанӣ омодаанд доруворро тибқи технология ва формулаҳои ширкатҳои пешрафтаи хориҷӣ истеҳсол кунанд. Аммо барои чунин ҳамкорӣ заминаи зарурии ҳуқуқӣ вуҷуд надорад. Ҳар як чунин дорувор бояд ҳамчун маҳсулоти нав аз ҷиҳати клиникӣ озмуда ва аз қайд гузаронда шавад. Ин раванд вақти зиёдеро мегирад. Дар робита ба ин, муҳимияти соддагардонии ин тартиб таъкид гардид.
Бо мақсади густариши содирот хароҷоти соҳибкорон барои гирифтани сертификатҳои Идораи назорат бар озуқаворӣ ва дорувории ИМА (FDA) ва Агентии тиббии Аврупо (EMA) аз ҳисоби буҷет пардохта мешавад.
Дар кишвари мо соҳаи истеҳсоли моддаҳо ва компонентҳои косметикии пайдоиши растанӣ рушд мекунад. Барои дастгирии ин фаъолият дар доираи лоиҳаҳои «Асакабонк» соли оянда барои ҳар як навъи растаниҳои доруворӣ плантасияҳои 5-гектара ташкил шуда, 5 лоиҳаи пилотӣ оид ба коркарди онҳо амалӣ карда мешаванд.
Дар маҷмӯъ, муайян карда шудааст, ки дар соҳаи фармасевтӣ портфели лоиҳаҳо ба маблағи умумии 1 миллиард доллар ташкил карда мешавад. Онҳо барои таъмин намудани сифати доруҳои серталаб дар сатҳе, ки ба аналогҳои хориҷӣ баробар аст, тақвияти рақобат ва боло бурдани дастрасии нархҳо равона карда мешаванд.
Дар ҷараёни мулоқот намояндагони соҳа фикру пешниҳодҳои худро оид ба рушди истеҳсолот, беҳтар намудани сифати маҳсулот, зиёд намудани содирот, инчунин ҳавасмандгардонии илм ва маориф баён карданд.
