Dasturning 34-bandida davlat xizmatida korrupsiya omillarini bartaraf etish, kadrlarni tanlov asosida ishga qabul qilish va ular faoliyati samaradorligini xolisona baholashning huquqiy asoslarini takomillashtirish vazifasi belgilgan.
Mazkur band ijrosini taʼminlash maqsadida 2022-yilning sentyabr oyiga qadar quyidagilar amalga oshiriladi:
- Davlat fuqarolik xizmati tizimiga kiruvchi davlat organlari va tashkilotlarida xodimlarni ishga qabul qilishda ochiq mustaqil tanlov orqali saralab olishning yagona qoidalarini ishlab chiqish.
- Davlat xizmatiga kirish va uni oʻtash, kadrlar zaxirasini shakllantirish, xodimlarni baholash bilan bogʻliq jarayonlarni raqamlashtirishni nazarda tutuvchi “Raqamli davlat xizmati” loyihasini amalga oshirish.
- Davlat xizmatida sohalar kesimida yuzaga kelishi mumkin boʻlgan korrupsiyaviy omillarni aniqlash va ularni bartaraf etish choralarini koʻrish.
- Davlat xizmatchilari va davlat organlari faoliyatini eng muhim samaradorlik koʻrsatkichlari (KPI) asosida baholash boʻyicha reyting tizimini joriy etish.
Ushbu vazifalarni amalga oshirish uchun masʼul ijrochilar etib — Prezident huzuridagi Davlat xizmatini rivojlantirish agentligi, Adliya vazirligi, Bandlik va mehnat munosabatlari vazirligi, Axborot texnologiyalari vazirligi belgilangan.
