Jamiyat ma’naviy qudratga erishganida mamlakat mislsiz yuksalishga erishadi. Bu qudrat tarixiy ildizdan kuch olib, ertangi kunga bo‘lgan ishonch bilan mustahkamlanadi. Yangi O‘zbekistondagi islohotlar xalqimiz qalbiga ana shunday tarixiy kuchni va barcha sohada birdek ilg‘or rivojlanish ishtiyoqini taqdim etmoqda. Buni O‘zbekistondagi Islom sivilizatsiyasi markazining bunyod etilishi ham tasdiqlaydi.
Ushbu muhtasham durdonaning Bosh me’mori — Prezidentimiz Shavkat Mirziyoyev Islom sivilizatsiyasi markazining rasmiy ochilish marosimida ilm- fan va madaniyat fidoyilariga, xususan, jurnalistlarga murojaat qilib: “Islom sivilizatsiyasi markazida to‘plangan har bir eksponat qanday bebaho boylik ekanini sizlar hammadan ko‘ra yaxshi tushunasiz. Ularni targ‘ib etish, xalqimizga, dunyoga tanitishda ham, avvalo, sizlarga tayanamiz.
Bu tengsiz boylikdan ilhomlanib, sizlar yaratadigan ilmiy tadqiqotlar, badiiy kitob, kino va teatr asarlari, kartina va ko‘rsatuvlar uch ming yillik tarix va madaniyatning so‘nmas ovozi bo‘lib dunyoga taralsin!
Yangi O‘zbekistonni tinchlik, ezgulik, bilim va ma’rifat diyori sifatida olamga tarannum etsin!
Xalqimiz, ayniqsa, yoshlarimiz uchun tarbiya va milliy g‘urur maktabiga aylansin!”, deya alohida ta’kidladi.
“Yangi O‘zbekiston” va “Pravda Vostoka” gazetalari tahririyati ushbu chaqiriqdan ilhomlanib yangi loyiha boshladi. Unga ko‘ra, ijodiy jamoamiz “Yangi O‘zbekiston” gazetasida har haftaning juma kuni “Tamadun tafakkuri” nomli maxsus qo‘shimcha sahifalar taqdim etib boradi.
“Tamadun tafakkuri” insoniyat ma’naviy va ijtimoiy taraqqiyotining eng yuqori nuqtasini ifodalaydigan konseptual tushuncha. Jumladan, tamadun rivojlanish, yuksak madaniyat, qonun ustuvorligi va ijtimoiy tartib demak. “Tafakkur” esa voqelikni anglashning oliy shaklidir.
Shu ma’noda, “Tamadun tafakkuri” jamiyatning taraqqiyot strategiyasi, milliy o‘zlikni va umuminsoniy qadriyatlarni bir nuqtada jamlab, xalqimizni asrlar mobaynida intiQib kutgan orzu-maqsadlari — Uchinchi Renessans sari boshlab boruvchi intelektual va ma’naviy qudratni anglatadi.
Maxsus sahifalarimizda O‘zbekistondagi Islom sivilizatsiyasi markazi mehvaridagi hayotiy falsafani, uning bor mazmun-mohiyatini, tarixiy ahamiyatini keng tarannum etadigan tahliliy maqolalar, olimlar, soha mutaxassislarining chiqishlari berib boriladi. Bu bilan shonli tariximizdan so‘zlovchi eng noyob eksponatlar haqidagi qiziqarli ma’lumotlarni, ilmiy markazning Uchinchi Renessansni yaratishdagi o‘rni va ahamiyatini xalqchil yoritib borishga harakat qilamiz.
Maqsadimiz — bu ma’lumotlarni o‘qigan xalqimiz Islom sivilizatsiyasi markazini borib ko‘rishga, qadim tariximiz bilan faxrlanib, porloq kelajagimizga ishonchi yanada mustahkamlanishiga xizmat qilsin. Muhtasham ma’rifat qasriga tashrif buyurganlar esa gazetamizdagi maqolalar, ma’lumotlar bilan tanishib, uni qaytadan kashf etsin.
Ushbu chiqishlarning ommabopligini ta’minlash maqsadida tahririyatimizning rasmiy www.yuz.uz veb-sayti, ijtimoiy tarmoqlardagi t.me/yuz_official, fb.com/yuz. uzNews, instagram.com/yuz.uz_news, youtube. com/@YUZ sahifalarida ham video va foto lavhalar, suhbatlar, reportajlar, tahliliy va axboriy materiallar tizimli ravishda berib boriladi.
Zero, butun dunyoni lol qoldirayotgan ushbu muhtasham maskan falsafasini baland pardalarda tarannum etish barchamizga, shu jumladan, bizning tahririyat jamoasiga ham g‘urur-iftixor bag‘ishlaydi.
Tahririyat
