Oʻzbekiston Savdo-sanoat palatasi va Pokistondagi Oʻzbekiston elchixonasi hamkorligida tadbirkorlar delegatsiyasining Karachi portiga rasmiy tashrifi amalga oshirildi.
Tashrifning asosiy maqsadi — oʻzbek mahsulotlarini va brendlarini xalqaro bozorlarga chiqarishda Karachi porti orqali eksport imkoniyatlarini kengaytirish, logistika sharoitlarini yaxshilash va yangi hamkorlik mexanizmlarini ishlab chiqishdan iborat boʻldi.
Karachi porti — Pokistonning eng yirik dengiz porti va Janubiy Osiyodagi asosiy logistika markazi. U orqali millionlab tonna yuk Yevropa, Amerika, Osiyo va Afrika bozorlariga yetkaziladi. Shu jihatdan, port Oʻzbekiston uchun muhim strategik ahamiyatga ega.
Tashrif davomida Oʻzbekiston delegatsiyasi port maʼmuriyati va logistika kompaniyalari bilan uchrashib, infratuzilma, bojxona, tranzit va yuk tashish tartiblari boʻyicha aniq maʼlumotlar oldi. Port rahbariyati oʻzbek mahsulotlarini qabul qilish va qayta yuklash uchun barcha sharoitlar mavjudligini taʼkidladi.
Muzokaralarda Oʻzbekiston tovarlari uchun port hududida maxsus ombor tashkil etish taklifi ilgari surildi. Bu tashabbus:
- mahsulotlarni vaqtincha saqlash va joʻnatishni yengillashtiradi,
- tranzit jarayonlarini soddalashtiradi,
- logistika xarajatlarini kamaytiradi,
- xalqaro bozorlarga chiqishni jadallashtiradi.
Port maʼmuriyati toʻqimachilik, meva-sabzavot, charm, kimyo va qurilish materiallariga yuqori qiziqish bildirib, ularning xalqaro raqobatbardoshligini qayd etdi.
Shuningdek, tadbirkorlarga konteyner parki, raqamlashtirilgan bojxona va yuk kuzatuv tizimlari haqida maʼlumotlar taqdim etildi.
Karachi portiga tashrif ikki mamlakat oʻrtasidagi iqtisodiy aloqalarni mustahkamlash bilan birga, Oʻzbekiston tovarlari uchun yangi eksport yoʻllarini ochishda muhim qadam boʻldi. Savdo-sanoat palatasi bu yoʻnalishda amaliy ishlar boshlanganini maʼlum qildi.
