Jumladan, Jizzax shahrida oʻtkazilgan tezkor tadbirda 1993-yilda tugʻilgan ikki nafar fuqaro tegishli hujjatlarsiz 400 dona “MISOPROSTOL” tabletkalari, 139 dona kapsula, 2 dona balzam va ularni qadoqlash uchun moʻljallangan 26 dona qutini 5 ming AQSH dollariga sotish paytida ashyoviy dalillar bilan ushlandi.
Tadbir davomida shahardagi bir ayollar fitnes-klubida qoʻlga olingan shaxslar tashkil etgan yashirin sex faoliyati fosh etildi. U yerda turli xil dori vositalari qoʻlbola usulda qadoqlanib, sotuvga tayyorlanayotgani aniqlandi.
Joyni koʻzdan kechirish jarayonida 1 dona qadoqlash uskunasi, 141 dona tayyor kapsula, 1 040 dona soxta gologramma, 237 dona shtrix-kod, 1 014 dona boʻsh kapsula hamda turli xil quti va paketlar ashyoviy dalil sifatida rasmiylashtirildi.
Shuningdek, DXX Samarqand viloyati boshqarmasi boshqa huquqni muhofaza qiluvchi idoralar bilan hamkorlikda oʻtkazgan tezkor tadbirda 1998-yilda tugʻilgan, farmatsevtika mahsulotlari chakana savdosi bilan shugʻullanuvchi MCHJ menejeri qoʻlga olindi.
U Qirgʻiz Respublikasidan aylanma yoʻllar orqali olib kirilgan va tarkibida psixotrop moddalar mavjud boʻlgan 9 800 dona dori vositasini shartli xaridorga 25 million soʻmga sotishga uringan paytida ashyoviy dalillar bilan ushlandi.
Hozirda har ikki holat yuzasidan surishtiruv ishlari olib borilmoqda.
