Усы жылдың еки айында санаат 7,7 процентке, хызметлер 15,4 процентке өсип, экспорт 3,5 миллиард долларды қураған, 8,3 миллиард доллар сырт ел инвестициялары тартылған.
Жыл басынан берли 9 ўәлаятты социаллық-экономикалық раўажландырыўға республикалық бюджеттен қосымша түрде 2,3 триллион сум ҳәм 500 миллион доллар ажыратылды. "Жаңа Өзбекстан көриниси"не енген 33 район ҳәм 330 мәҳәлле ушын жергиликли бюджетлерге 3,9 триллион сум қаржы ажыратылды. 37 қурамалы район ҳәм 903 мәҳәлле ушын жәми 3,9 триллион сум, жергиликли бюджеттен 1,3 триллион сум қаратылды. Биринши басқышта 283 "драйвер" жойбар ушын 1 триллион сум қаржы ажыратылған.
Жылдың ақырына шекем халық көп жыйналатуғын көше, жағалық ҳәм жол бойы аймақларының инфраструктурасын раўажландырыў жойбарларына жәми 1,2 триллион сум, туризм потенциалы жоқары болған 150 мәҳәллениң инфраструктурасын жақсылаўға 450 миллиард сум, 400 мәҳәлледе 50 санаат микроорайын шөлкемлестириўге 150 миллиард сум қаратылады.
Соның менен бирге, халықаралық жағдайдың жедел кескинлесип атырғаны экономика тармақларының турақлылығына, сыртқы саўда жоллары ҳәм импорт баҳаларының турақлылығына қосымша тәсир көрсетип атырғаны атап өтилди. Бундай шараятта ҳәр бир тармақ ҳәм аймақ басшысы жағдайды алдыннан баҳалап, ҳәр қыйлы сценарийлер тийкарында ҳәрекет етиўи керек екенлиги атап өтилди.
Быйыл инфляцияны 6-6,5 проценттен арттырмаў әҳмийетли екенлиги атап өтилди.
Атап айтқанда, дүньяда нефть баҳасының кескин қымбатлаўы транспорт хызметлери ҳәм нефть-химия өнимлериниң өзине түсер баҳасына тәсир көрсетип атырғаны, полиэтилен ҳәм полипропилен баҳасының өсиўи де бақланып атырғаны атап өтилди. Сол себепли тийкарғы азық-аўқат өнимлерин импорт етиў, транспорт-логистика мәселелерин шешиў ҳәм альтернатив жөнелислерден пайдаланыў бойынша жедел илажлар көриў ўазыйпасы қойылды.
Соның менен бирге, исбилерменлердиң шийки зат, базар ҳәм кредит пенен байланыслы машқалаларын жедел шешиў әҳмийетли екенлиги атап өтилди.
Экспортёрлар көтерип атырған тийкарғы мәселелерден бири транспорт ҳәм логистика екени, дүньяда жүз берип атырған ўақыялар себепли экспорт жүк тасыўындағы үзилислер ҳәм баҳалардың өсиўи айрықша тәшўиш оятып атырғаны атап өтилди.
Усы мүнәсибет пенен қоңсы мәмлекетлер менен транспорт ҳәм саўда мәселелери бойынша тығыз бирге ислесиўди күшейтиў, ҳаўа транспорты арқалы азық-аўқат өнимлериниң экспортын шөлкемлестириў, исбилерменлер ушын жеңиллетилген тарифлерди енгизиў илажларын көриў тапсырылды.
Сырт ел инвестициялары мәселеси де ҳәр тәреплеме додаланды. Кескин халықаралық жағдай айырым жойбарларды әмелге асырыўға тәсир көрсетиўи мүмкин екени атап өтилди. Усы мүнәсибет пенен ҳәр бир әмелге асырылып атырған жойбарды турақлы таллап барыў, инвесторлар менен күнлик қарым-қатнасты жолға қойыў ўазыйпасы қойылды.
Банк-қаржы тараўында бизнести қоллап-қуўатлаў ушын ажыратылып атырған кредитлердиң динамикасы да көрип шығылды.
Мәмлекетимиз басшысы бундай унамлы процесске қарамастан, ҳеш бир басшының босасыўға ҳақысы жоқ екенин атап өтти. Ҳәзирги қыйын шараятта қәўип-қәтерлерди алдыннан анықлаў, оларды азайтыў бойынша анық режелер тийкарында жумыс алып барыў, тармақ ҳәм аймақларда жүзеге келип атырған машқалалардың кескинлесиўин күтпей, жедел шешиў зәрүр екенлиги атап өтилди.
Жуўапкерлерге инфляцияны азайтыў, санаат ҳәм экспорт көрсеткишлерин тәмийинлеў, инвестициялық жойбарларды әмелге асырыўды жеделлестириў, банк системасында ҳәм қурылыс бағдарламаларында жүзеге келиўи мүмкин болған машқалаларды сапластырыў бойынша анық тапсырмалар берилди.
