Нызам менен "Ипотека ҳаққында"ғы, "Баҳалы қағазлар базары ҳаққында"ғы, "Төлемсизлик ҳаққында"ғы нызамларға ипотека қатнасықларына электрон гиреў хатын енгизиўди, бундай гиреў хаты менен тәмийинленген миннетлемелерди орынлаўды, ол бойынша ҳуқықларды басқа шахсқа өткериўди ҳәм оннан пайдаланыўға байланыслы басқа да механизмлерди белгилеўди, сондай-ақ, талап етиў ҳуқықлары ҳәм гиреў хаты сапластырыў массасына киргизилмейтуғынын нәзерде тутатуғын өзгерислер ҳәм қосымшалар киргизилмекте.

Онда, "Ипотека ҳаққында"ғы нызамға киргизилген қосымшаға бола:

Электрон гиреў хатына өзгерислер киргизиў гиреў хатының нызамлы ийеси ҳәм гиреў қойыўшы тәрепинен электрон гиреў хатына өзгерислер киргизиў ҳаққындағы келисим (қосымша келисим) формасын Бирден-бир интерактив мәмлекетлик хызметлер порталында толтырыў арқалы әмелге асырылады;

Электрон гиреў хатлары бойынша ҳуқықларды басқа шахсқа өткериў депо есап бетине тийисли жазыў киргизиў арқалы әмелге асырылады. Электрон гиреў хатына болған ҳуқықлар алыўшының депо есап бетине тийисли жазыў киргизилген ўақыттан баслап оған өтеди ҳәм депо есап бетинен көширме менен тастыйықланады.

Нызам рәсмий жәрияланған күннен баслап күшке киреди.