2. Сораў: 19-январь күни Газа қаласында оқ атыўды тоқтатыў ҳәм гиреўге алынғанларды алмасыў ҳаққындағы келисим күшке кирди. Өзбекстан Сыртқы ислер министрлигиниң бул бағдардағы позициясы қандай?
Жуўап: Өзбекстан Республикасы Сыртқы ислер министрлиги Газа қаласында оқ атыўды тоқтатыў ҳәм гиреўге алынғанлардың алмасыўын қоллап-қуўатлайды. Биз бул келисимлерди кескинликти азайтыў ҳәм регионда узақ күтилген тынышлықты тәмийинлеў жолындағы оғада әҳмийетли унамлы қәдем сыпатында қараймыз.
Биз Қатар, АҚШ ҳәм Египеттиң келисимге ерисиўдеги ҳәрекетлерин жоқары баҳалаймыз. Биз барлық тәреплерди келисим шәртлерине әмел етиўге шақырамыз.
Өзбекстан Жақын Шығыста турақлылық ҳәм қәўипсизликти тәмийинлеўге қаратылған халықаралық ҳәрекетлерди қоллап-қуўатлаўға садық қалады.
3. Сораў: Өзбекстан 1-январь күни БРИКС бойинша бирге ислесиўши мәмлекетке айланды. Мәмлекетимиздиң бул ассоциациядағы қатнасыўынан қандай пайда күтилмекте?
Жуўап: БРИКС көп тәреплеме бирге ислесиў ҳәм шерикликтиң абырайлы ҳәм жедел бирлеспеси болып есапланады. Бундай өз-ара бирге ислесиў модели БМШтың орайлық ролин сақлап қалған ҳалда және де әдалатлы дүнья тәртибиниң жаңа архитектурасын беккем тийкар болыўы мүмкин.
БРИКС ағзаларының көпшилиги бизиң дәстүрий шериклеримиз. Биз биринши гезекте экономикалық мәплерди гөзлеймиз. БРИКС үлкен имканиятларға ийе үлкен базар болып есапланады. Аўқам ағзалары менен байланыслардың ҳәр тәреплеме кеңейиўи халқымыздың абаданлығын тәмийинлеўде унамлы орын ийелейди.
4. Сораў: Екинши ушырасыўы Анкарада болып өткен Әзербайжан ҳәм Түркия менен үш тәреплеме бирге ислесиў платформасын Өзбекстан қалай баҳалайды? Басқа мәмлекетлер менен де усындай үш тәреплеме формат жаратыў ямаса оған басқа мәмлекетлерди тартыў арқалы Баку-Ташкент-Анкара форматын кеңейтиў имканиятлары көрип шығылмақта ма?
Жуўап: Биз бул платформаны мәмлекетлеримиз арасындағы пайдаланылмаған үлкен потенциалды жүзеге шығарыў ушын оғада әҳмийетли майдан деп билемиз.
Ушырасыў күн тәртиби оғада бай болып, бирге ислесиўдиң дерлик барлық тараўларын қамтып алды. Барлық қатнасыўшылар тәрепинен регионаллық ҳәм глобал характердеги әҳмийетли мәселелер бойынша мәмлекетлер арасындағы бирге ислесиўди кеңейтиўге айрықша итибар қаратылды. Саўда-экономикалық бирге ислесиўди беккемлеў ушын бар күш-ғайратымызды иске қосыўға келисип алдық. Мәмлекетлеримиз арасындағы байланысларды жақсылаў зәрүр екенлиги атап өтилди.
Хабарыңыз бар, биринши ушырасыў 2022-жылы болып өткен. Ташкентте ҳәзиргиси избе-из екинши ҳәм басқа да мәмлекетлерди тартыў мәселеси еле бул форматта күн тәртибинде емес.
