Бул ретки мәмлекетлик сапар етиў Өзбекстан - Қазақстан стратегиялық шериклик ҳәм аўқамласлық қатнасықлары тарийхында жаңа басқышты баслап беретуғыны атап өтилди.

Сапарға таярлық шеңберинде Ҳүкиметлераралық комиссияның мәжилиси ҳәм бизнес-форум табыслы өткерилгени, Ташкентте Қазақстан медицинасы күнлери, Қазақстан кино көргизбеси, Астана күнлери ҳәм бир қатар мәдений илажлар өткерилип атырғаны қанаатланыўшылық пенен атап өтилди.

Жыл басынан берли товар алмасыў 4 миллиард долларды қурады. Өз-ара товар жеткерип бериўди көбейтиў ҳәм импорттың орнын басыў есабынан бул көрсеткишти 10 миллиардқа жеткериў ўазыйпасы тур. Жүк тасыў көлеми артып бармақта, қалалар арасында ҳәптесине 40 тан аслам авиақатнаўлар әмелге асырылмақта.

6,5 мың қоспа кәрхана шөлкемлестирилди, тийкарғы тармақларда ири жойбарлар әмелге асырылмақта. Санаат кооперациясын раўажландырыў мақсетинде баҳасы 8 миллиард доллардан аслам жойбарлар портфели таярланған. Бундай жойбарларды алға қойыў ушын биргеликтеги Инвестициялық платформаны иске қосыў усыныс етилди.

Сөйлесиўлерде энергетика, транспорт, химия санааты, аўыл ҳәм суў хожалығы, қоршаған орталықты қорғаў, IТ ҳәм басқа да әҳмийетли бағдарларда өз-ара пайдалы шерикликти кеңейтиўге айрықша итибар қаратылды.

Аймақлараралық байланысларды буннан былай да кеңейтиў әҳмийетли екени атап өтилди. Еки мәмлекет аймақлары басшыларының биринши Кеңесин 2026-жылы Қазақстанда өткериўге келисип алынды.

Мәмлекет басшылары регионаллық ҳәм халықаралық әҳмийетке ийе мәселелер бойынша да пикир алысты.