1972-жылы қурылған поликлиника көптен берли капитал оңлаўға, жумысты шөлкемлестириў стандартларын жаңалаўға, көрсетилип атырған хызметлердиң сапасын арттырыўға мүтәж. Мәҳәлледеги 13 мыңнан аслам халыққа басланғыш медициналық жәрдем көрсетилетуғын бул мәкеме 16 ға шамалас аўыл ушын туўыўды қабыллайтуғын бирден-бир орын болып есапланады.
"Жумыс жүклемеси оғада үлкен, шараят ҳәм имканиятлар болса түсиндириўди талап етпейди - әсиресе, жаўынның ески кабинетлердиң сур реңли әйнеклерине урылып атырғаны фонында. Бул жерде гәп анық бир поликлиниканың машқаласы ҳаққында емеслигин түсинип алыў керек. Бул кең көлемли жағдай - бирлемши медициналық-санитариялық жәрдемди шөлкемлестириўдеги артта қалыўшылықтың көриниси болып есапланады. Диагностика ҳәм емлеў стандартларын жетилистирип, кадрлар потенциалын арттырамыз, - деди Саида Мирзиёева.
Сапар даўамында қәнигелер тәрепинен ўәлаяттың денсаўлықты сақлаў системасын жақсылаў бойынша жаңа мастер-реже толық үйренилди. Президент Администрациясы басшысының атап өтиўинше, өзгерислер тек ғана имаратларды оңлаўға емес, ал басланғыш медициналық-санитариялық жәрдем системасына болған қатнастың өзине де тийисли болады.
"Бүгин көргенлерим және бир мәрте тастыйықлады: денсаўлықты сақлаўдағы машқалалар ҳаққында тек ғана есабат ҳәм ҳүжжетлерге қарап баҳа бериўге болмайды", - деп қосымша етти Саида Мирзиёева.
