Қарар менен сыртқы саўда операцияларының мониторингин буннан былай да жетилистириў ҳәм шәртнамалардың орынланыўында тийкарсыз дебиторлық ҳәм кредиторлық қарыздарлықлардың қәлиплесиўиниң алдын алыў мақсетинде:
сыртқы саўда шәртнамаларының саны 22 ден 6 ға (экспорт, импорт, бартер, ишки экспорт, инвойс тийкарында экспорт, инвойс тийкарында импорт) қысқартылды;
сыртқы саўда қатнасыўшылары ушын бир шәртнама шеңберинде түрли бажыхана режимлеринен пайдаланыў имканияты жаратылды;
буннан былай Сыртқы саўда операцияларының бирден-бир электрон мәлимлеме системасында товарларды елимизден алып шығыўды нәзерде тутатуғын "орайласқан экспорт", "экспорт биржа", "экспорт-консигнация", "қайта ислеў (республика аймағында)", "экспорт лизинг", "алып шығыў" шәртнамалары улыўма "экспорт" шәртнамасы түринде, товарларды елимизге алып кириўди нәзерде тутатуғын "орайласқан импорт", "импорт биржа", "қайта ислеў (республика сыртында)", "импорт лизинг" ҳәм "алып кириў" шәртнамалары улыўма "импорт" шәртнамасы түринде қәлиплестириледи;
"импорт" шәртнамасы тийкарында товарларды "еркин айланысқа шығарыў (импорт) " ямаса "бажыхана аймағында қайта ислеў" бажыхана режимлерине ямаса кейин ала сырт елге сатыў мақсетинде "бажыхана қоймаханасы", "еркин қоймахана" ҳәм "еркин бажыхана зонасы" бажыхана режимлерине рәсмийлестириўге рухсат етилди;
"экспорт" шәртнамасы тийкарында товарларды "экспорт" бажыхана режимине ямаса бажыхана аймағына алдын алып кирилген товарларды "реэкспорт" бажыхана режимине ямаса "бажыхана аймағында қайта ислеў" бажыхана режиминен кейинги қайта ислеў операциясы ушын "еркин қоймахана" бажыхана режимине рәсмийлестириў имканияты енгизилди;
товарлардың шәртнама орынланыўында сәўлелениўи бажыхана жүк декларациясының келисим өзгешелиги бәнтине муўапық әмелге асырылады.
Ўәкилликли экономикалық оператор статусын алыў процесслери әпиўайыластырылды ҳәм оларға қолланылатуғын қолайлықлар кеңейтилди. Бунда:
бажыхана төлемлерин кешиктирип төлеў мүддети 20 жумыс күнинен 30 календарь күнине шекем создырылды;
қәўиплилик дәрежеси орташа болған операторлардың товарлары бир саат ишинде рәсмийлестирилиўи белгиленди;
юридикалық шахстың басшысы, бас бухгалтери ҳәм ўәкилликли шахсының Ҳәкимшилик жуўапкершилик ҳаққындағы кодекстиң жуўапкершиликке тартылғанлық жағдайлары еки ҳәм оннан артық мәрте болмаў шәрти атап өтилди;
сыртқы саўда операциялары бойынша мүддети өткерилип жиберилген дебитор қарыздарлық суммасы 10 проценттен артпаўы белгилеп қойылды.
Бул қарар рәсмий жәрияланған сәнеден баслап 3 айдан соң күшке киреди.
