Ири халықаралық көргизбе шеңберинде шөлкемлестирилген Өзбекстан миллий стендинде Өзбекстан Республикасы Туризм комитети, «Uzbekistan Airways» АЖ, «Silk Road Samarkand» туристлик орайы, сондай-ақ, 10 нан аслам туристлик компаниялардың ўәкиллери мәмлекетимиздиң ең тартымлы туристлик бағдарлары ҳаққында мағлыўматлар бермекте.
Мийманларға ЮНЕСКОның Дүнья жүзилик мийрасы дизимине киргизилген Самарқанд, Бухара ҳәм Хийўа қалаларында жайласқан әййемги архитектуралық естеликлер, заманагөй кеўилашар комплекслер, республикамыздың түрли аймақларындағы көплеген туристлик объектлер, сондай-ақ, өзбек халқының үрп-әдетлери, миллий тағамлары, көркем өнери ҳәм бай мәдений мийрасы ҳаққында айтып бериледи.
Көргизбениң исбилерменлик бағдарламасы шеңберинде туризм компаниялары, туроператорлар, авиакомпаниялар ҳәм тармақ шөлкемлериниң ўәкиллери менен G2B ҳәм B2B форматында ушырасыўлар өткерилмекте. Ушырасыўларда бирге ислесиўди кеңейтиў, жаңа туристлик бағдарларды ислеп шығыў ҳәм Өзбекстанның туристлик имканиятларын халықаралық базарда үгит-нәсиятлаў мәселелери додаланбақта.
Өзбекстан бай тарийхый мийрасы ҳәм мәдений ҳәр түрлилиги себепли россиялы туристлердиң үлкен итибарын тартып, россиялылар арасында ең абырайлы туристлик бағдарлар ТОП-10 лығына киретуғынын атап өтиў керек.
MITT - бул 30 жылдан аслам ўақыт даўамында Москвада өткерилип киятырған туризм ҳәм миймандослық индустриясы халықаралық көргизбеси болып есапланады. Бул илаж туризм тараўындағы ең ири ҳәм әҳмийетли В2В майданларынан бири болып, ҳәр жылы дүньяның ҳәр қыйлы мәмлекетлеринен тараў қәнигелерин бирлестиреди.
